އާދީއްތަ ދުވަހު ބާއްވާ ރައްޔިތުންގެ މަޖިލީހުގެ އިންތިޚާބަށް އެމްޑީޕީން ކުރިޔަށް ގެންދާ އެޕާޓީގެ މިސްރާބު ހަމަ މަގަށް ކެމްޕެއިންގެ މަގުމަތީ ހަރަކާތްތައް މިއަދު ނިންމާލައިފިއެވެ.

މަގުމަތީގެ ހަރަކާތްތައް ނިންމާލުމުގެ ގޮތުން މިއަދު ހަވީރު އެޕާޓީން ވަނީ މަގުމަތީގެ ރެލީއެއް ބާއްވާފައެވެ. މާފަންނު ސޯޝަލް ސެންޓަރުން ފަށައިގެން ހެންވޭރު އާޓިފިޝަލް ބީޗަށް ކުރިޔަށް ގެންދިޔަ މިރެލީގައި ކުރީގެ ރައީސް އިބްރާހީމް މުޙައްމަދު ޞާލިޙާއި އެމްޑީޕީގެ ރައީސް އަބްދުﷲ ޝާހިދާއި އެމްޑީޕީގެ ޗެއާޕަރސަން ފައްޔާޒް އިސްމާޢީލާއި، އެކި ދާއިރާތަކަށް އެމްޑީޕީގެ ޓިކެޓްގައި ވާދަކުރައްވާ ކެނޑިޑޭޓުންނާއި އާއްމުން ބައިވެރިވިއެވެ.

އާޓިފިޝަލް ބީޗަށް މިރެލީ ނިންމާލުމަށްފަހު އެޕާޓީގެ ފަރާތުން ހާމަކޮށްފައިވާ ގޮތުގައި، އިންތިޚާބުގެ އެއްދުވަސް ކުރިން އެމްޑީޕީން މަގުމަތީގެ ރެލީ ބޭއްވީ އެހެން ޕާޓީތަކުންވެސް މާލޭގައި މާދަމާ ހަވީރު ރެލީތައް ބާއްވާތީއެވެ. 

ކުރިޔަށް އޮތް ރައްޔިތުންގެ މަޖިލީހަށް އެމްޑީޕީގެ ޓިކެޓްގައި 89 ކެންޑުޑޭޓުން ވާދަކުރާނެއެވެ. ރައްޔިތުންގެ މަޖިލީހުގެ އިންތިޚާބުގެ ވޯޓު ނެގުން ކުރިޔަށް ދާނީ، އާދީއްތަ ދުވަހުގެ ހެނދުނު 8:00އިން ހަވީރު 5:30އަށެވެ.

ނިމިގެން މިދާ ރައްޔިތުންގެ މަޖިލީހުގެ އިންތިޚާބުގައި އެމްޑީޕީން ބޮޑު ކާމިޔާބެއް ހޯދި އިރު، ރާއްޖޭގެ ބަރުލަމާނީ ޙަޔާތުގައި އެއްޕާޓީއަކުން މަޖިލީހުގެ ސުޕަރމެޖޯރިޓީ ހޯދި ޕާޓީއަކަށް ވެފައި ވަނީ އެމްޑީޕީއެވެ. އެމްޑީޕީގެ ތެރޭގައި އުފެދުނު ޚިޔާލުތަފާތުވުންތާއެކު، އެޕާޓީ ދެބައިވެފައި ވާތީ، މިފަހަރު އެޕާޓީއަށް މަޖިލީހުގެ ސުޕަރ މެޖޯރިޓީ ލިބިދާނެ ކަމާއިމެދު ބައެއް ފަރާތްތަކުން ސުވާލު އުފައްދައެވެ.