ނިމިދިޔަ ހަފްތާގައި ބުންޑެސްލީގާގެ ތަށި ޔަގީންކޮށްފައިވާ ބެޔާން ލެވަކޫސެންއިން ޔޫރޮޕާ ލީގުގެ ސެމީ ފައިނަލުން ޖާގަ ހޯދައިފިއެވެ. ކުއާޓާ ފައިނަލުގައި އިނގިރޭސިވިލާތުގެ ވެސްޓް ހޭމްއާ ދެކޮޅަށް ކުޅެ، ލުވެކޫސެން އިން ސެމީގެ ޖާގަ ހޯދީ 3-1 ގެ އެގްރިގޭޓު ސްކޯއަކުންނެވެ. 

ބުރާސްފަތި ދުވަހުގެ ރޭ އިނގިރޭސިވިލާތުގައި ކުޅުނު ކުއާޓާ ފައިނަލުގެ ދެވަނަ ލެގު 1-1 އިން އެއްވަރުވުމުން، އެ ޓީމުން ބަލިނުވެ ދަމަހައްޓަމުން އަންނަ ރެކޯޑު މިވަނީ 44 މެޗަށް އިތުރުވެފައެވެ. ނަމަވެސް މި މެޗުން ލެވަކޫސެން ސަލާމަތްވެފައިވަނީ ވަރަށް ހަނިކޮށެވެ. ވެސްޓް ހޭމްއިން މެޗުގެ 13 ވަނަ މިނެޓުގައި މައިކަލް އެންޓޯނިއޯގެ ގޯލަކުން ލީޑު ނަގާފައިވަނިކޮށް، ލެވަކޫސެންއަށް މެޗުގެ ނަތީޖާ ހަމަހަމަ ކުރެވުނީ މެޗު ނިމެން ކުޑަތަންވެފައި ވަނިކޮށް، 89 ވަނަ މިނެޓުގައި ޖެރެމީ ފްރިމްޕޮންގް ކާމިޔާބުކުރި ގޯލަކުންނެވެ. 

ސެމީ ފައިނަލްގައި ލެވަކޫސެން ބައްދަލުކުރާނީ އިޓަލީގެ އޭއެސް ރޯމާއާއެވެ. 

ލެވަކޫސެންގެ ތާރީހުގައި މިއީ އާދަޔާ ހިލާފު ސީޒަނެކެވެ. މިދިޔަ ހަފްތާގައި ލީގު ކަށަވަރުކުރިއިރު، މީގެ ކުރިން އެ ޓީމަށް މިކަން ހާސިލްކުރެވިފައެއް ނުވެއެވެ. އަދި އެ ޓީމުން އަންނަނީ މި އަހަރު ތިން ތަށި ކާމިޔާބުކުރުމަށް މަސައްކަތް ކުރަމުންނެވެ.

ޔޫރޮޕާ ލީގުގެ ސެމީ ފައިނަލަށް ދެން ދަތުރުކޮށްފައިވަނީ، ލިވަޕޫލް ކަޓުވާލުމަށްފަހު އެޓްލާންޓާ އާއި އޭސީ މިލާން ކަޓުވާލުމަށްފަހު ރޯމާ އަދި ބެންފީކާ ކަޓުވާލުމަށްފަހު މާސޭއެވެ.