ކްރިމިނަލްކޯޓުން ކުރި ހުކުމްތައް ހައިކޯޓުން ބާޠިލްކުރުމާއި އެކު، މިރޭ މިނިވަންވަޑައިގެންނެވި، ކުރީގެ ރައީސް ޢަބުދުﷲ ޔާމީން ޢަބުދުލްޤައްޔޫމް މާދަމާ ފުވައްމުލަކަށް ވަޑައިގަންނަވާނެ ޕީއެންއެފުން ބުނެފިއެވެ.

ރައީސް ޔާމީންގެ ޕާޓީ ޕީއެންއެފްގެ އިސް ބޭފުޅެއް ކަމުގައިވާ މުޙައްމަދު މަލީޙް ޖަމާލު ވިދާޅުވީ، ރައީސް ޔާމީނު ފުވައްމުލަކަށް ވަޑައިގަންނަވާނީ މާދަމާ މެންދުރު ކަމަށެވެ. އަދި އެޕާޓީގެ ކެމްޕޭން ޓީމްތައް މިރޭ ފުވައްމުލަކަށް ފުރާނެ ކަމުގައި ވެސް މަލީޙް ވިދާޅުވިއެވެ.

ރައީސް ޔާމީން މިނިވަން ވުމާއިއެކު މިރެއިން ފެށިގެން އެމަނިކުފާނި ރައްޔިތުންގެ މަޖިލީހުގެ އިންތިޚާބުގެ ކެމްޕޭނުގައި ޢަމަލީ ގޮތުން ބައިވެރިވެވަޑައިގަންނަވާނެއެވެ. ރައީސް ޔާމީން ޕީއެންއެފްއަށް މަޖިލީހުގެ ގޮނޑިތަކެއް ކާމިޔާބުކޮށްދެއްވުމަށް ނުކުންނަވާއިރު ކެމްޕޭނުގައި ދެން ބާކީ އޮތީ އެންމެ ދުވަހެކެވެ. ހޮނިހިރު ދުވަހުގެ އިރު އޮއްސި 6:00 އިން ފެށިގެން ކެމްޕޭން ކުރުން މަނާވެގެންދާނެއެވެ.

ރައީސް ޔާމީންގެ އައު ޕާޓީ ރަޖިސްޓްރީ ކުރުމުގެ މަރުހަލާ ފުރިހަމަކުރެވުނީ، އިންތިޚާބަށް ކެންޑިޑެންސީ ހުށައެޅުމުގެ ސުންގަނޑި ހަމަވިފަހުން ކަމުގައިވާތީ، ޕީއެންއެފްގެ ޓިކެޓްގައި އެއްވެސް ބޭފުޅަކަށް މަޖިލީހަށް ވާދަކުރައްވާކަށް ފުރުޞަތެއް ނުލިބުނެވެ. އެހެންވެ އެޕާޓީގެ މެމްބަރުން ރައްޔިތުންގެ މަޖިލީހުގެ ދާއިރާތަކަށް ވާދަކުރައްވަނީ މިނިވަން ކެންޑިޑޭޓުންގެ ގޮތުގައެވެ.