ރައީސް ޔާމީނުގެ މައްޗަށް ކުރިމިނަލްކޯޓުން އިއްވި ހުކުމްތަކާއި ގުޅިގެން އެމަނިކުފާނު ދިވެހިރާއްޖޖޭގެ ހައިކޯޓަށް ހުށައެޅުއްވި އިސްތިއުނާފު މައްސަލައަކީ، ފެންނަ ފެނުމަށް މިއީ އެހާ އޮމާންކޮށް ދިޔަ އިސްތިއުނާފީ މަރުހަލާއެއް ނޫން ކަމުގައި ރައީސުލްޖުމްހޫރިއްޔާ ޢަބުދުﷲ ޔާމީން ޢަބުދުލްޤައްޔޫމް ވިދާޅުވެއްޖެއެވެ.

އެމަނިކުފާނުގެ ފަރާތްޕުޅުން ހައިކޯޓަށް ހުށައެޅުއްވި އިސްތިއުނާފުގެ މައްސަލަ އެމަނިކުފާނަށް ކާމިޔާބުވެގެން ނިމުނު ނަމަވެސް ރައީސް ޔާމީނުވަނީ އިސްތިއުނާފުގެ މައްސަލަ ނުނިމި ދިގުލައިގެން ދިޔުމުގެ ސަބަބުން އެމަނިކުފާނުގެ ޙައްޤުތަކެއް ގެއްލިގެން ދިޔަކަން ފާހަގަކުރައްވާފައެވެ. 2023 ވަނަ އަހަރު ބޭއްވި ރިޔާސީ އިންތިޚާބުގައި ވާދަކުރެއްވުމަށް އެމަނިކުފާނު ކެންޑިޑެންސީވެސް ހުށައެޅުއްވިއެވެ. އެހެން ނަމަވެސް އެމަނިކުފާނުގެ ކެންޑިޑެންސީ އިލެކްޝަންސް ކޮމިޝަނުން ބަލައިނުގަތީ މިއަދު ހައިކޯޓުން ބާޠިލްކުރި ހުކުމްތަކާއި ގުޅިގެން އެމަނިކުފާނު ބަންދުގައި ހުންނެވުމުންނެވެ. އޭރު ވެސް ހައިކޯޓުގައި މިމައްސަލަތަކުގެ ޝަރީއަތްތައް ހިނގަމުން ދިޔައެވެ.

މީގެ އިތުރުން، ސަރުކާރު ބަދަލުވުމަށް ފަހު ޝަރީއަތުގެ އަޑުއެހުންތައް ނުބޭއްވި ކެންސަލް ވަމުން ދިޔުމާއި، 21 ނޮވެމްބަރު 2023ގައި މައްސަލައިގެ އަޑުއެހުންތައް ނިންމާލުމަށްފަހު ހުކުމް ކުރުމާއި ދެމެދު ހަތަރުމަހަށްވުރެ ގިނަ ދުވަސް ހޭދަވެގެން ދިޔުންވެސް އެމަނިކުފާނު ފާހަގަކުރައްވާފައިވެއެވެ.

ރައީސް ޔާމީން ވިދާޅުވީ، މައްސަލައިގެ ޝަރީއަތް އެހާ ދިގުލައިގެން ދިޔައީ އެހެންވެގެން ކަމަށެވެ. އަދި ސްޕްރީމްކޯޓުން ހެކި ބަލައިގަތުމުގައި ނިންމަވާފައިވާ ގޮތަށް ހައިކޯޓުންވެސް ޢަމަލުކުރެއްވި ނަމަ މިއަށްވުރެ އަވަހަށް މިމައްސަލަތައް ނިމިގެން ދިޔައީސް ކަމަށް ދެކެވަޑައިގަންނަވާ ކަމުގައި ރައީސް ޔާމީން ވިދާޅުވިއެވެ.

އަދި އިސްތިއުނާފްގެ މައްސަލަ އޮމާންކޮށް ދިޔަނަމަ އެމަނިކުފާނުގެ ކެންޑިޑެންސީގެ މައްސަލަ ސްޕްރީމްކޯޓަށް ދިޔުމުގެ ކުރިވެސް އެމައްސަލަ ނިމުނީސް ކަމަށް ދެކެވަޑައިގަންނަވާ ކަމުގައިވެސް ރައީސް ޔާމީން ވިދާޅުވިއެވެ.

ރައީސް ޔާމީން ހުކުމްތަކުން މިނިވަންވެވަޑައިގެންނެވުމާއި އެކު އެމަނިކުފާނު ވަނީ، ސަޕޯޓަރުންނާއި އަދި އެމަނިކުފާނު އަލަށް އުފެއްދެވި ޕާޓީ ޕީއެންއެފްގެ އިސްބޭފުޅުންނާއި މެމްބަރުންނާއި ބައްދަލުކުރައްވާފައެވެ.