ވ. އާރަށް ކުއްޔަށް ދޫކުރުމުގައި އެއް މިލިއަން ޑޮލަރުގެ ރިޝްވަތު ނަންގަވައި އެ ފައިސާ ލޯންޑާކުރެއްވުމުގެ ކުށުގައި ކުރީގެ ރައީސް އަބްދުﷲ ޔާމީނުގެ މައްޗަށް ކްރިމިނަލް ކޯޓުން ކުރި ހުކުމް ބާޠިލްކޮށް އެމައްސަލަ އަލުން ބެލުމަށް ހައިކޯޓުން އެންގުމާއި އެކު ރައީސް ޔާމީން ބަންދުން މިނިވަން ވެއްޖެއެވެ.

އެމްއެމްޕީއާރުސީ މެދުވެރިކޮށް، ވ. އާރަށް ކުއްޔަށް ދޫކުރުމުގައި އެއް މިލިއަން ޑޮލަރުގެ ރިޝްވަތު ނަންގަވައި އެ ފައިސާ ލޯންޑާކުރެއްވުމުގެ ކުށުގައި ކުރީގެ ރައީސް އަބްދުﷲ ޔާމީން، ދައުލަތުން އުފުލި ދެދައުވާއެއް ސާބިތުވާކަމަށް ނިންމައި، އެމަނިކުފާނު 11 އަހަރަށް ޖަލަށް ލުމަށާއި، 5 މިިލިއަން ޑޮލަރުން ޖޫރިމަނާކޮށް އެފައިސާ 6 މަސްދުވަހުގެ ތެރޭގައި ދެއްުކުމަށް ކްރިމިނަލް ކޯޓުން ޙުކުމްކުރީ، 25 ޑިސެމްބަރު 2022 ގައެވެ.

އެމައްސަލަތައް ދިވެހިރާއްޖޭގެ ހައިކޯޓުގައި އިސްތިއުނާފްކުރީ ރައީސް ޔާމީނުގެ ފަރާތްޕުޅުންނެވެ.

އެދައުވާތައް ސާބިތުވާކަމަށް ކުރިމިނަލް ކޯޓުން ކުރި ޙުކުމްތަކުގެ ތެރެއިން ފުރަތަމަ ބާތިލްކޮށްފައި ވަނީ ރިޝްވަތު ނެންގެވިކަމަށް ބުނެ ކުރި ދައުވާގައި ކޮށްފައިވާ ހުކުމެވެ. އެހުކުމް ބާޠިލްކޮށް އެމައްސަލަ އަލުން ބެލުމަށް ދިވެހިރާއްޖޭގެ ހައިކޯޓުން އެންގީ ބުރާސްފަތި ދުވަހު ހަވީރު ބޭއްވި ޝަރީޢަތުގެ މަޖިލީހުގައެވެ. އަދި ދެވަނަ ޙުކުމް ބާޠިލްކޮށް އެމައްސަލަ އަލުން ބަލަށް އަންގާފައި ވަނީ ބުރާސްފަތި ދުވަހުގެ ރޭ ބޭއްވި ޝަރީއަތުގެ މަޖިލީހުގައެވެ.

ރައީސް ޔާމީނުގެ މައްޗަށް ކްރިމިނަލް ކޯޓުން ކޮށްފައިވާ ޙުކުމްތައް ބާޠިލްކޮށްފައި ވަނީ، އެމައްސަލަތައް ބެއްލެވި ފަނޑިޔާރު ޙުސައިން ޝަފީޢު އާއި ފަނޑިޔާރު ޙުޒައިފާ މުޙައްމަދާއި ފަނޑިޔާރު މުޙައްމަދު ސަލީމްގެ އިއްތިފާޤުންނެވެ.

ރައީސް ޔާމީނުގެ މައްޗަށް ކޮށްފައިވާ މި ދެހުކުމް ބާޠިލް ކުރިނަމަވެސް އަދިވެސް އެމަނިކުފާނުގެ މައްޗަށް ދައުވާ އުފުލާފައިވާ ކޮރަޕްޝަނާއި މަނީ ލޯންޑަރިންގެ ދައުވާތަކެއް ކްރިމިނަލްކޯޓުގައި އެބައޮތެވެ.