އާދީއްތަ ދުވަހު ބޭއްވުމަށް ހަމަޖައްސާފައިވާ ރައްޔިތުންގެ މަޖިލީހުގެ އިންތިޚާބުގައި، ރައްޔިތުންގެ މަޖިލީހުގެ އިންތިޚާބުގެ ވޯޓު ނެގުން ކުރިޔަށްދާނީ، ހެނދުނު 8:00އިން ހަވީރު 5:30އަށް ކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.

އެކޮމިޝަނުން ވިދާޅުވީ، ހަވީރު 5:30ގައި ކިއޫތައް ބަންދު ކުރާނެ ކަމަށާއި، ވޯޓުލުމުގެ ވަގުތު އިތުރު ނުކުރާނެ ކަމަށެވެ. އަދި ހޮނިހިރު ދުވަހުގެ އިރުއޮއްސި 6:00 އިންފެށިގެން ހޯމަ ދުވަހުގެ ހެނދުނު 6:00 އާއި ހަމައަށް އެއީ ކެމްޕޭން ކުރުން މަނާ ވަގުތު ކަމުގައިވެސް ކޮމިޝަނުން ވަނީ ހަނދާންކޮށްދީފައެވެ.

އިލެކްޝަންސް ކޮމިޝަނުން ހާމަކުރައްވާފައިވާ ގޮތުގައި، މިއޭޕްރީލް މަހުގެ 21 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބު 2024ގެ ވޯޓު ނެގުމަށް ވާންޖެހޭ ތައްޔާރީތަކުގެ ތެރެއިން، ރަށްރަށަށް ވޯޓުފޮއްޓާއި ވޯޓު ކަރުދާސް ފޮނުވުމުގެ މަސައްކަތް މިހާރު ވަނީ ފަށާފައެވެ.

Advertisement

ރައްޔިތުންގެ މަޖިލިސް އިންތިޚާބުގައި މިފަހަރު އަލަށް އުފެއްދި 6 ދާއިރާއާއެކު ޖުމުލަ 93 ދާއިރާއަކަށް މެމްބަރުން އިންތިޚާބު ކުރާނެއެވެ. މި އިންތިޚާބުގައި ވާދަކުރުމަށް ޖުމުލަ 386 ކެންޑިޑޭޓަކު ކެންޑިޑެންސީ ހުށައެޅިއިރު، ކެންޑިޑެންސީ އަނބުރާ ނެގުމުގެ މުއްދަތު ހަމަވުމަށްފަހުގައި ބައެއް ކެންޑީޑޭޓުން ވަނީ އިންތިޚާބު ދޫކޮށްލައި އެހެން ކެނޑިޑޭޓުންނަށް ތާއީދު ކުރާކަން ވެސް ހާމަކޮށްފައެވެ.