މިސަރުކާރުގެ ސިޔާސަތަކީ އޮޅުވާލުމާއި ބިރުދެއްކުމާއި، ރައްޔިތުން މުށުތެރެއަށް ލައިގެން ގަދަބާރުން ކަންކަން ކުރުމުގެ ސިޔާސަތުކަމުގައި ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ،  ރައްޔިތުންގެ މަޖިލީހުގެ ހިންނަވަރު ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓް އަދި މިހާރުގެވެސް އެދާއިރާގެ މެމްބަރު ޖީހާން މަޙްމޫދުގެ ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ.

ރައީސް ޞާލިޙް ވިދާޅުވީ، އެބޭފުޅުން ތިއްބެވީ ވެރިކަމުގައި ކަމަށާއި ނުލާހިކު ފަސޭހައިން އެބޭފުޅުންނަށް ކެމްޕޭން ކުރެވެން އޮތް ނަމަވެސް ރައްޔިތުންނަށް ދޮގުހަދައި އޮޅުވާލުމާއި ބިރު ދެއްކުމަކީ އެބޭފުޅުން ސިޔާސަތުކަމުގައި ހަދާފައިވާކަމަށެވެ. ރައީސް ޞާލިޙް ވިދާޅުވީ އެމްޑީޕީން ވެރިކަން ކުރި އިރު ރައްޔިތުންގެ މަޖިލީހުގެ އިންތިޚާބުގައި އެމްޑީޕީން ސުޕަރ މެޖޯރިޓީ ހޯދީ ރައްޔިތުންނަށް ބިރުދައްކައިގެން ނޫންކަމަށެވެ. 

ރައީސް ވިދާޅުވީ، ސިޔާސީ ވިސްނުމާއި ގުޅިގެން އެއްމޑީޕީގެ ސަރުކާރުގައި އެއްވެސް މުވައްޒަަފަކަށް ބިރުދައްކައި ވަޒީފާއިން ވަކިކޮށްފައި ނޯންނާނެ ކަމަށެވެ. އެހެން ނަމަވެސް އަނެއްކާވެސް މިއަދު ފެންނަނީ ވަޒީފާގެ ބިރުދެއްކުމާއި ވަޒީފާއިން ވަކިކުރުމުގެ ކަންތައްތައް އިއާދަވެގެންދާތަން ކަމުގައި ރައީސް ޞާލިޙް ވިދާޅުވިއެވެ.

މިގޮތުން ޕީއެންސީގެ މެމްބަރަކު ކުންފުނިތަކުގެ މުވައްޒަފުންނަށް ވަޒީފާގެ ބިރު ދެއްކުމަށް ގޮވައިލި ގޮވާލުމާއި، ދިއްދޫގައި ޕީއެންސީގެ މެމްބަރުންގެ ގެތަކަށް އެކަނި ކަރަންޓް ދިނުމަށް އެޕާޓީގެ މެމްބަރުން ގޮވައިލި ގޮވާލެއްވުންތައް އެމަނިކުފާނު ފާހަގަކުރެއްވިއެވެ.

ރައީސް ޞާލިޙް ވިދާޅުވީ، އެފަދަ ބިލެއް އެމްޑީޕީން މަޖިލީހަށް ހުށައަޅާއި ބޭނުންހާ ގޮތަށް މީހުން ވަޒީފާއިން ނުކުރެވޭނެކަން ޤާނޫނުގައި ލިޔެ ތަންފީޒް ކުރައްވާނެ ކަމަށެވެ.  

މިސަރުކާރުން މަޖިލިސް އިންތިޚާބާއި ދިމާކޮށް ރައްޔިތުންނަށް ދައްކަމުންދާ ބިރުތަކުގެ މިސާލުދައްކަވައި ރައީސް ޞާލިޙް ވިދާޅުވީ ރައްޔިތުންނަށް އުނދަގުލާއި ދުއްތުރާ ކުރުމުގެ ވިސްނުން ހުރި ބަޔަކު ވެރިކަމުގައި ބައިތިއްބަން ހެޔޮ ނުވާނެ ކަމަށެވެ. އެހެންކަމުން ވީހާވެސް އަވަހަށް ކުރަން އޮތް ކަމަކީ، އެބޭފުޅުން ދުރުކުރުން ކަމުގައި ރައީސް ޞާލިޙް ވިދާޅުވިއެވެ.