ކުޅުދުއްފުށި ސިޓީއަށް ދިމާވެފައިވާ ކަރަންޓުގެ މައްސަލަ ޙައްލު ކުރުމަށް ފެނަކައިގެ އެދުމުގެ މަތިން ސްޓެލްކޯގެ ގިނަދުވަސްވީ ތަޖުރިބާކާރު އިލެކްޓްރިކަލް އަދި މެކޭނިކަލް އިންޖީނިއަރުން ހިމެނޭ ޓީމެއް އެރަށަށް ފޮނުވައިފިއެވެ.

ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވީ، ސްޓެލްކޯގެ  ޓީމާއި ފެނަކައިގެ މުވައްޒަފުން ގުޅިގެން އެ މައްސަލަ ޙައްލުކޮށް ވީއެންމެ އަވަހަކަށް ކުޅުދުއްފުށި ސިޓީގެ ރައްޔިތުންނަށް ކަަރަންޓުގެ ޚިދުމަތް ޔަގީންކޮށް ދެއްވޭނެ ކަަމަށެވެ.

ކުޅުދުއްފުށީ އިންޖީނުގެއިން ކަރަންޓް ދިނުމުގައި ދިމާވެފައިވާ މައްސަލަ ތަކުގެ ސަބަބުން ރައްޔިތުންނަށް ވަނީ ވަރަށް ބޮޑުތަކުލީފެއް އުފުލަން ޖެހިފައެވެ. ކުޅުދުއްފުށީ އިންޖީނުގެއިން ރޯދަމަހުން ފެށިގެން ކަރަންޓް ދެމުން އައިސްފައިވަނީ، ޝެޑިއުލްކޮށްގެން އެކި ސަރަހައްދުން ކަރަންޓްގެ ޚިދުމަތް މެދު ކަނޑާލަމުންނެވެ. އެކަމާއި ގުޅިގެން ކުޅުދުއްފުށީގެ ބައެއް އާއްމުން ހިތްހަމަ ނުޖެހި އިހްތިޖާޖުވެސް ކޮށްފައިވެއެވެ.