ރައްޔިތުންގެ މަޖިލީހުގެ އިންތިޚާބުގައި ވާދަކުރާ ކެންޑިޑޭޓުންނާއި ދެކޮޅަށް އެންޓިކެމްޕޭން ކުރާ ފަރާތްތަކާއި މެދު ފިޔަވަޅު އަޅާނެ ކަމުގައި އިލެކްޝަންސް ކޮމިޝަނުން ބުނެފިއެވެ.

އެކޮމިޝަނުން މިއަދު ނެރުނު ބަޔާނުގައި ބުނީ، މަޖިލިސް އިންތިހާބުގައި ކެންޑިޑޭޓުންނަށް ތާއީދު ހޯދަން ކުރާ މަސައްކަތުގައި އެންޓި ކެމްޕެއިންގެ އަމަލުތައް ފެންނަމުންދާ އެކޮމިޝަނަށް ފާހަގަކުރެވިފައިވާ ކަމަށެވެ. އެގޮތުން ތާއީދު ހޯދުމަށް ބޭނުން ކުރާ ޕޯސްޓަރުތަކާއި ބެނާތަކުގައި ވެސް ކެންޑިޑޭޓެއްގެ އިންތިހާބީ ހައްޤަށް އުނިކަން ލިބޭގޮތަށް މެސެޖުތައް ދައުރު ކުރަމުންދާކަންވެސް ފާހަގަކުރެވިފައި ވާކަމުގައި އިލެކްޝަންސް ކޮމިޝަނުން ވަނީ ބުނެފައެވެ.

އެކޮމިޝަނުން ބުނީ، ކެނޑިޑޭޓުންގެ އިންތިޚާބީ ޙައްޤުތަކަށް އުނިކަން ލިބޭ ގޮތަށް ޢަމަލު ކުރުމާއި، ކެންޑިޑޭޓުންނާއި މެދު ދޮގު މައުލޫމާތުތައް ފެތުރުމަކީ، ޤާނޫނު ނަމްބަރު 11/2008 އިންތިޚާބުތަކާއި ބެހޭ އާއްމު ޤާނޫނުގެ 29 ވަނަ މާއްދާގެ (ށ) އިން މަނާކޮށްފައިވާ ކަމެއް ކަމަށެވެ. މީގެ އިތުރުން ، އިންތިޚާބުތަކާއި ވެހޭ އާއްމު ޤަވާއިދުގެ 19 ވަނަ މާއްދާގައި ބަޔާންކޮށްފައިވާ ސުލޫކީ މިންގަނޑަށް ތަބާވުމަށް ހުރިހާ ކެންޑިޑޭޓުންނަށްވެސް އިލްތިމާސް ކުރާ ކަމުގައި އެކޮމިޝަނުން ވަނީ ބުނެފައެވެ.

އިލެކްޝަންސް ކޮމިޝަނުން ބުނީ، އެފަދަ ޢަަމަލުތައް ކުރާ ފަރާތްތަކާއި މެދު އެކޮމިޝަނުން ޤާނޫނި ގޮތުން އެޅެން ހުރި ފިޔަވަޅުތައް އަޅަމުން ގެންދާނެ ކަމަށެވެ.