ހޯމް މިނިސްޓަރާއި ފުލުހުންގެ އިސްވެރިންގެ މައްޗަށް ކޯޓު ހުރުމަތް ކެނޑުމުގެ މައްސަލައެއް ހިންގުމުގެ މަސައްކަތް ފަށައިފިއެވެ.

މިގޮތުން ކްރިމިނަލްކޯޓުން މީޑިއާތަކަށް ބުނެފައި ވަނީ އެފަދަ މައްސަލައެއް އެކޯޓުގެ ފަނޑިޔާރުންގެ މަޖިލީހަށް އެޖެންޑާކޮށްފައިވާ ކަމަށެވެ. އެހެން ނަމަވެސް އެކަމާއި ގުޅޭ ތަފްސީލެއް ހާމަކޮށްފައެއް ނުވެެއެވެ.

ހޯމް މިނިސްޓަރު ޢަލީ އިޙްސާނާއި، ފުލުހުންގެ އިސްވެރިންގެ ތެރޭގައި ހިމެނޭ ބޭފުޅުންތަކެއްގެ މައްޗަށް ކޯޓު ހުރުމަތް ކެނޑުމުގެ މައްސަލައެއް ކުރިޔަށް ގެންދިޔުމަށް އެކޯޓު ފަނޑިޔާރުންގެ މަޖިލީހަށް ހުށައަޅާފައި ވަނީ، އެކޯޓުން ބަލައި ޙުކުމްކޮށްފައިވާ 119 ކިލޯގެ މަސްތުވާތަކެތީގެ މައްސަލައިގައި، ހޯމް މިނިސްޓްރީ އާއި ފުލުހުން، ކޯޓުގެ ޙުކުމަށް ފާޑުކިޔައި ވާހަކަފުޅު ދެއްކެވި ކަމަށް ބަަލައިގެންކަމަށް އެނގިފައިވެއެވެ.

އެމައްސަލައިގައި ދައުވާ އުފުލި މީހުންގެ މައްޗަށް ކުށް ސާބިތު ނުވާކަން ކްރިމިނަލް ކޯޓުން ކަނޑައަޅާފައި ވަނީ، އެމައްސަލަ ސާބިތުވާ ވަރަށް ހެއްކި ހުށައަޅާފައި ވަނިކޮށް ކަމަށް އެދުވަހު ހޯމް މިނިސްޓަރު ވިދާޅުވި އިރު، އެމައްސަލައިގައި ފުލުހުން އަމަލުކުރި ގޮތާއި ގުޅޭ ގޮތުން ފުލުހުންގެ މުއައްސަސާއިން ތައްޔާރުކޮށްފައިވާ ވީޑިއޯ ރިޕޯޓެއްވެސް ފުލުހުން ވަނީ އާއްމުކޮށްފައެވެ.

އެމައްސަލަ އާއި ގުޅޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރ ޢަލީ އިޙްސާން ވިދާޅުވެފައި ވަނީ، ކުށުގެ ބޮޑެތި މައްސަލަތައް ކޯޓުން ނިންމުމަށްފަހު އެކަމާއި ގުޅޭ ގޮތުން ފުލުހުން ކުރި މަސައްކަތްތަކާއި، ހެކިތައް ހާމަކުރެއްވުމަށް ނިންމަވާފައިވާ ކަމަށާއި، 119 ކިލޯގެ މަސްތުވާތަކެތީގެ މައްސަލަ އާއި ގުޅޭ ތަހްޤީޤީ މައުލޫމާތުތަކާއި، އެމައްސަލަ ކުރިޔަށް ދިޔަގޮތް ހާމަކުރުމަކީ އެގޮތުން ބޭއްވޭ ފުރަތަމަ ނޫސްވެރިންގެ ބައްދަލުވުން ކަމަށެވެ.

ކޯޓު ހުރުމަތް ކެނޑުމުގެ މައްސަލަ ހިންގުމަށް ކްރިމިނަލްކޯޓުން މަސައްކަތް ކުރަމުންދަނީ، ހޯމް މިނިސްޓަރާއި އެކު އެދުވަހު ފުލުހުން ބޭއްވި ނޫސްކޮންފަރެންސްގައި ބައިވެރިވެފައިވާ ފަރާތްތަކުގެ މައްޗަށެވެ. އެދުވަހުގެ ނޫސްކޮށްފަރެންސްގައި ބައިވެރިވެފައި ވަނީ، ހޯމް މިނިސްޓަރ ޢަލީ އިޙްސާންގެ އިތުރުން، ޑްރަގް އެންފޯސްމަންޓް ޑިޕާޓްމެންޓްގެ ހެޑް އަހުމަދު ޝާކިރާއި ޗީފް އިންސްޕެކްޓަރު އަހުމަދު ވަހީދާއި، ސަބް އިންސްޕެކްޓާ އޮފް ޕޮލިސް މަމްދޫހު ހަސަންއެވެ.