ހއ. ދިއްދޫގައި ކަރަންޓްގެ ޚިދުމަތް ހަމައެކަނި ޕީއެންސީގެ މެމްބަރުންގެ ގެތަކަށް ދިނުމަށް ގޮވާލައި، ޕީޕީއެމް ޕިއެންސީގެ ކޯލިޝަންގައި ހިމެނޭ މެމްބަރަކު ރޭ ދެއްކި ވާހަކަތައް ކުއްވެރިކޮށް، ޕީއެންސީން ބަޔާނެއް ނެރެފިއެވެ.

ޕީއެންސީގެ ބަޔާނުގައި ބުނެފައި ވަނީ، ރޭ ދިއްދޫގައި ބޭއްވި ކެމްޕެއިން ޖަލްސާގައި ފެނަކައިގެ އެސިސްޓެންޓް މެނޭޖަރުގެ މަޤާމުގައި ހުންނެވި  ޢަބްދުﷲ ރަޝީދު "ކަރަންޓު ހަމައެކަނި ދޫކުރަންވީ ޕާޓީގެތަކަށް" ކަމަށް ބުނެ ދެއްކި ވާހަކަތައް ވަރަށް ހަރުކަށިކޮށް ކުށްވެރިކުރާ ކަމަށެވެ.

ޕީޕީއެމް ޕީއެންސީން ނެރުނު ނޫސްބަޔާނުގައި، ބުނީ، އޭނާ ދެއްކި ވާހަކަތަކަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތު ނޫން ކަމަށެވެ. އަދި އެއީ ޕާޓީގެ ސިޔާސަތެއްވެސް ނޫންކަމަށާއި، ރައީސް މުޢިއްޒުގެ ސިޔާސަތަކީ ވަކި ފިކުރަކަށް ނުބަލައި ރައްޔިތުންނަށް ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުމުގެ ސިޔާސަތެއް ކަމުގައިވެސް ޕީޕީއެމްޕީއެންސީ ނެރުނު ބަޔާނުގައި ބުނެފައިވެއެވެ.

މިއީ މިހަފްތާގެ ތެރޭގައި ޕީޕިއެމް ޕީއެންސީ ކޯލިޝަނުގައި ހިމެނޭ މެމްބަރުން، ވޯޓަށް ނުފޫޒު ފޯރުވުމުގެ ގޮތުން ދައްކާފައިވާ ވާހަކަތަކާއި ގުޅިގެން އެދެޕާޓީން ނެރެފައިވާ ދެވަނަ ނޫސް ބަޔާނެވެ.