އިއްޔެ ރާއްޖެއަށް ކުރި ވިއްސާރައިގައި، މާލެ ސިޓީގެ އެކި ސަރަހައްދުތަކުގައި ފެންބޮޑުވެ ފެންވަދެގެން ޖުމްލަ 132 ތަނަކުން ރިޕޯޓުކޮށްފައިވާ ކަމުގައި އެންޑީއެމްއޭއިން ވިދާޅުވެއްޖެއެވެ.

އެންޑީއެމްއޭއިން ވިދާޅުވީ، ރިޕޯޓް ކުރި 132 ތަނުގެ ތެރެއިން 122 ތަނަކަށް ޒިޔާރަތްކޮށް ހާލަތު ބެލިފައިވާ ކަމަށެވެ. އަދި ފެންވަން ނަމުން ދިޔަ 104 ތަނެއްގައި ވެލި ބަސްތާތައް ޖަހައިދެވުނު ކަމުގައިެވސް އެ އޮތޯރިޓީން ވަނީ ބުނެފައެވެ.

އެންޑީއެމްއޭއިން ވިދާޅުވީ، ތެރެއިން ދިރިއުޅެން ދަތިވާކަމަށް ރިޕޯޓު ކުރެވުނު 10 ގެއެއްގެ ރެޕިޑް އެސެސްމެންޓް ދިވެހި ރެޑް ކްރެސެންޓުގެ އެހީތެރިކަމާއިއެކު ނިންމައި، ދިރިއުޅެން ދަތިވާކަމަށް ފާހަގަ ކުރެވުނު 06 ގެއެއްގެ ޖުމްލަ 42 މީހުންނަށް ވަގުތީ ބޯހިޔާވަހިކަމާއި ކެއިން ބުއިން 1 ރެއަށް ހަމަޖައްސާދެވިފައިވާކަމަށެވެ.

މީގެ އިތުރުން މި ވިއްސާރައިގައި އަތޮޅުތަކުގެ ރަށްތަކުގެ ތެރެއިން، ށ. ފީވަކުގެ 20 ގެއަކަށާއި ށ. ފޯކައިދޫގެ 03 ގެއަކަށް އަދި ތ. ވަންދޫގެ 01 ގެއަކަށް ގެއްލުން ލިބިފައިވާ ކަމަށާއި، ތ. ހިރިލަންދޫ އާއި ތ. ވަންދޫއަށް ބޯކޮށް ވާރޭވެހި ފެންބޮޑުވެގެން ފެން ހިއްކުމުގެ މަސައްކަތް ކުރެވުނު ކަމުގައިވެސް އެންޑީއެމްއޭއިން ވަނީ ވިދާޅުވެފައެވެ.

ފާއިތުވި ހަމަސް ދުވަހުގެ ތެރޭގައިމާލޭގައި 3 ފަހަރު ފެންބޮޑުވެ ގޭގެއަށް ފެންވަދެ ވަނީ ގެއްލުންތައް ލިބިފައެވެ.