މިސަރުކާރު ވެރިކަމަށް އައުމާއި އެކު ހުއްޓާލާފައި އޮތް، ފ. މަގޫދޫ އެއާޕޯޓުގެ މަސައްކަތް ކުރިޔަށް ގެންގޮސްދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ ކެންޑިޑޭޓުންނަށް ތާއީދު ހޯއްދަވައި ދެއްވުމަށް ރައީސް ޑރ. މުޙައްމަދު މުޢިއްޒު ކުރައްވަމުން ގެންދަވާ ދަތުރުފުޅުގައި މިއަދު ވަނީ ފ. މަގޫދޫއަށް ވަޑައިގެންފައެވެ. އެމަނިކުފާނު މަގޫދުއަށް ވަޑައިގެންނެވީ، މި ސަރުކާރުން މިހާރު އެއާޕޯޓު އެޅުމުގެ މަސައްކަތް ފަށާފައިވާ، ނިލަންދޫއަށް ޒިޔާރަތް ކުރެއްވުމަށް ފަހުގައެވެ. ރައްޔިތުންގެ މަޖިލީހުގެ ނިލަންދޫ ދާއިރާއަށް ވާދަކުރައްވަނީ، ރައީސް ޑރ. މުހައްމަދު މުޢިއްޒުގެ ކޮއްކޯފުޅެވެ.

ރައީސް ޑރ. މުހައްމަދު މުއިއްޒު މިއަދު ވަނީ، މަގޫދޫއަށް ވަޑައިގެން އެރަށު ކައުންސިލާއި، އ.ތ.މ ކޮމިޓީގެ މެމްބަރުންނާއި ބައްދަލުކުރައްވާފައެވެ. މިބައްދަލު ކުރެއްވުމުގައި، މަގޫދޫގެ އެއަރޕޯޓްގެ މަޝްރޫޢުވެސް އަދި ތަރައްޤީގެ އެހެން މަޝްރޫއެއްވެސް ހުއްޓާނުލައްވައި ނިންމަވައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވާފައިވާ ކަމުގައި،  ރައީސުލްޖުމްހޫރިއްޔާގެ އޮފީހުން ވިދާޅުވެފައި ވެއެވެ.