ރޭ އިޒްރާއީލާއި ދެކޮޅަށް އީރާނު ދިން ރައްދު ހަމަލާތަކުގައި، އިޒްރޭލުގެ ސަރަހައްދުތަކަށް އެރީ އީރާނުން ފޮނުވާލި، 7 ބެލެސްޓިކް މިސައިލް ކަމުގައި އިޒްރޭލުގެ ޚަބަރުތައް ގެނެސްދޭޭ ފަރާތްތަކުން ރިޕޯޓުކޮށްފިއެވެ.

އީރާނުން އިޒްރޭލަށް އަމާޒުކޮށް ރޭ ހަމަލާތައް ދީފައި ވާއިރު، އިޒްރޭލުން ބުނެފައި ވަނީ، އީރާނުގެ ހަމަލާތަކުގެ 99 ޕަސެންޓް ނާކާމިޔާބު ކޮށްލެވުމުނު ކަމަށެވެ. މިގޮތުން އުރުދުން އާއި ސަޢޫދީ ޢަރަބިއްޔާގެ އެހީތެރިކަމާއިއެކު އިޒްރޭލުގެ ސަރަހައްދާއި ހަމައަށް ހަމަލާތައް ފޯރުމުގެ ކުރިން ވައިގެ ތެރޭގައި މިސައިލްތައް ވަނީ ގޮއްވާލާފައެވެ.

އިޒްރޭލުން ބުނެފައިވާ ގޮތުގައި އީރާނުން ފޮނުވާލި 185 ޑްރޯންވެސް ކާމިޔާބު ކަމާއި އެކު ވައްޓާލި އިރު 103 ބެލެސްޓިކް މިސައިލްގެ ތެރެއިން 110 މިސައިލް ވައްޓާލި ކަމަށެވެ. އަދި އީރާނުން ފޮނުވާލި، 36 ކްރޫޒް މިސައިލްވެސް އިޒްރޭލުގެ ސަރަހައްދުތެރެއަށް ވަނުމުގެ ކުރިން ވައްޓާލި ކަމަށްވެސް ބުނެފައި ވެއެވެ.

Advertisement

އީރާނު އިޒްރޭލަށް ދިން ހަމަލާތަކުން ދިފާޢުކޮށް ދިނުމަށް، އެމެރިކާ އާއި އިނގިރޭސި ވިލާތުގެ އަސްކަރީ މަތިންދާ ބޯޓުތަކުން ހަރަކާތްތެރިވެފައި ވާއިރު އިޒްރޭލުގެ އަސްކަރީ ބޯޓުތަކަށް އުރުދުން އާއި ސައޫދީ އަރަބިއްޔާއިން ވަނީ އެހީތެރިކަން ފޯރުކޮށްދީފައެވެ.

އިޒްރޭލަށް އަމާޒުކޮށް އީރާނުން ރޭ ފޮނުވާލި ހަމަލާތަކަކީ، ދިމިޝްޤުގައި ހުންނަ އީރާނުގެ ކޮންސިއުލޭޓަށް އިޒްރާއީލުން ދިން ހަމަލާތަކުގެ ބަދަލު ހިފުމުގެ ގޮތުން ފޮނުވާލި ހަމަލާތަކެެކެވެ.