އަޅުގަނޑުމެން ކުރާ ހެޔޮ ޢަމަލުތަކުގެ ޘަވާބު އުނިވާކަންތައްތަކުން އަޅުގަނޑުމެން ރައްކާތެރިވާންޖެހޭ. 

އެހެންކަމުން ރޯދައާ ހެޔޮ އަމަލުގެ ހަތާވީސްވަނަ އެޕިސޯޑުގައި ޝެއިޙް އިލްޔާސް ޖަމާލް ވާހަކަފުޅު ދެއްކެވީ ތިމާއަށް ތިމާ ފެނުމުގެ ނުބައިކަމާ ގުޅޭގޮތުން.

މީހާ ހަލާކުވެގެން ހިނގައިދާނެ ތިންކަމެއް ކީރިތި ރަސޫލާ ބަޔާންކޮށްދެއްވި ހިނދު އޭގެތެރެއިން އެންމެ ނުރައްކާތެރިކަމެއްގެ ގޮތުގައި ބަޔާންކުރެއްވީ:

إِعجابُ المرْءِ بنفْسِهِ މާނައީ: "މީހާ އޭނާގެ އަމިއްލަ ނަފްސާމެދު ހެއްލުންތެރިވުމެވެ." 

އާދެ! އެއީ ތިމާއަށް ތިމާ ފެނުން. ތިމާކުރާ ހެޔޮކަންތަކާމެދު ހެއްލުންތެރިވުން. އެހެންމީހުންނަށް ތިމާއަށް ކުރެވޭ ވަރަށް ހެޔޮކަންތައް ނުކުރެވޭކަމުގެ އިޙްސާސްކުރެވެން ފެށުން. ތިމާއަށް އުޅެވެނީ އެންމެ ރަނގަޅަށްކަމަށް ޤަބޫލުކުރެވެން ފެށުން. މީ ވަރަށް ނުރައްކާތެރި ބައްޔެއް. 

އެހެންކަމުން މި މާތް މައްސަރުގައި އަޅުގަނޑުމެންނަށް ކިތައްމެ ގިނަ ހެޔޮ ޢަމަލުތަކެއް ކުރެވުނު ނަމަވެސް އެކަމާމެދު ހެއްލުންތެރިވެ ފަޚުރުވެރިވެ ބޮޑާނުވުމަށް ނަޞޭޙަތްތެރިވަން.