ޖީއެމްޓީ ގަޑިން ހޮނިހިރު ދުވަހުގެ ރޭގެ ގާތްގަނޑަކަށް 8:00 ހާއިރު އިސްރާއީލަށް އަމާޒުކޮށް އިރާނުން ފޮނުވާލި 200 އަށް ވުރެން ގިނަ ޑްރޯން ހަމަލާތަކުގައި އިސްރާއީލަށް ބޮޑު ގެއްލުންތަކެއް ނުލިބޭކަމަށް އެ ގައުމުގެ ދިފާއީ ތަރުޖަމާނު، ޑެނިއަލް ހެގަރީ ބުނެފިއެވެ. އޭނާ އިތުރަށް ފާހަގަކޮށްފައިވާ ގޮތުގައި، އިސްރާއީލާއި އެ ގައުމަށް ހެޔޮ އެދޭ ގައުމުތައް ކަމުގައިވާ، އެމެރިކާ އާއި އިނގިރޭސި ވިލާތުގެ އެހީގައި އިރާނުން ފޮނުވާލި ގިނަ ހަމަލާތައްވަނީ އިސްރާއީލާ ހިސާބަށް ދިއުމުގެ ކުރިން ވައްޓާލާފައެވެ.

ދިފާއީ ރައްދެއްގެ ގޮތުން އިރާނުން އިސްރާއީލުގެ މިލިޓަރީ ބޭސްއަކަށް އަމާޒުކޮށް ދިން މި ހަމަލާތަކުން އެ މިލިޓަރީ ބޭސްއަށް ވެސް ބޮޑު ގެއްލުންތަކެއް ނުވާކަމަށާއި، އެއެވެސް މީހަކު މަރުވެފައިވާ ނުވާކަމަށް އިސްރާއީލުން ބުނެއެވެ. މިއީ އިރާނުން އިސްރާއީލާ އަމާޒުކޮށް ފޮނުވާލި ފުރަތަމަ ސީދާ ހަމަލާއެވެ.

އިރާނުގެ މި ހަމަލާއާ ގުޅިގެން އެ ގައުމުން ބުނީ، މިއީ ޑެމާސްކަސްގައި ހުންނަ އިރާނުގެ ކޮންސިއުލޭޓަށް މި މަހުގެ 1 ވަނަ ދުވަހު ދިން ނުރައްކާތެރި ހަމަލާއާ ގުޅިގެން ދިން ރައްދެއް ކަމަށެވެ. 

އިރާނުން އ.ދ. އަށް ކަނޑައަޅާފައި ހުންނަ ސަފީރު ހާމަކޮށްފައިވާ ގޮތުގައި، އިރާނުގެ މި ހަމަލާއާއެކީ، ސީރިއާގައި ހުންނަ އެ ގައުމުގެ ކޮންސިއުލޭޓު އޮފީހަށް ދިން ހަމަލާގެ ރައްދުދީ ނިމުނީއެވެ. އަދި އިސްރާއީލުން އިތުރު ގޯހެއް ހަދައިފިނަމަ، ބަދަލުގައި މި ހަމަލާއަށް ވުރެން ވަރުގަދަކޮށް އިރާން ފެނިގެން ދާނެކަމަށް ވެސް ބުނެފައިވެއެވެ. 

އިރާނުން އ.ދ. އަށް ފޮނުވާފައިވާ ސިޓީގައި ވެސް، އެ ގައުމުން މަސްރަހު ހޫނު ކުރަން މަސައްކަތް ނުކުރާނެކަމަށް ބުނެފައިވެއެވެ.