މާލެއަށް މިއަދު ވެހުނު ބޯވަރޭގައި ފެންބޮޑުވުމުގެ ސަބަބުން ދިރިނޫޅެވޭ ވަރުވި، 5 ގެއެއްގެ 34 މީހަކު ވަގުތީ ހިޔާތަކަށް ބަދަލުކުރުމުގެ މަސައްކަތް ކުރަމުންދާކަމުގައި، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ.

އެއޮތޯރިޓީން ވިދާޅުވީ، ރެޕިޑް އެސެސްމަންޓްއިން ދިރިއުޅެން ދަތިވެފައި ވާކަމަށް، ފާހަގަކުރެވުނު 9 ގެއެއްގެ ތެރެއިން 5 ގެއެއްގެ 34 ފަރާތެއް ބަދަލުކުރުމަށް ނިންމާ ވަގުތީބޯހިޔާވަހިކަން ހަމަޖައްސައިދިނުމެ މަަސައްކަތް ކުރަމުންދާ ކަމަށެވެ. މީހުން ވަގުތީ ހިޔާތަކަށް ބަދަލު ކުރާ ގޭބިސީތަކުގެ މީހުންނަކީ، އެމީހުން ދިރިއުޅެމުން ދިޔަ ތަންތަނުގައި ފެން ބޮޑުވުމުގެ ސަބަބުން ފާޚާނާ ކުރުމަށް ބުރޫ އަރައި، ނަޖިސް ލީކުވުމުގެ މައްސަަލަތައް ހިނގާފައިވާ ތަންތަން ކަމަށެވެ.

އެންޑީއެމްއޭއިން ވިދާޅުވީ، ވަގުތީބޯހިޔާވަހިކަމާއެކު ކެއިންބުއިންވެސް ހަމަޖައްސައިދެވޭނެ ކަމަށާއި، އަދި މާދަމާއަކީ ސްކޫލްތަކުގެ އިމްތިހާން ވެސް ފެށޭ ދުވަހެއް ކަމުން ސްކޫލް ދަރިވަރުންނަށްވެސް ކަންކަން ފަސޭހަވާނެ ގޮތަށް އިންތިޒާމްތައް ދަނީ ހަމަޖައްސައިދެމުން ކަމަށެވެ. 

މީގެ އިތުރުން މުދަލާއި ތަކެތި ސަލާމަތް ކުރުމަށް މިހާތަނަށް 73 ތަނެއްގައި 495 ވެލިބަސްތާ ވަނީ ޖަހާފައި ކަމުގައިވެސް އެންޑީއެމްއޭ ވަނީ ވިދާޅުވެފައެވެ.