މިއަދު މާލެއަށް ބޯކޮށްވާރޭވެހި، ވަރަށް ބޮޑަށް ފެންބޮޑުވެ ގޭގެއަށާއި، ފިހާރަތަކަށް ފެންވަންނަމުންދާތީ، އިންޖީނުލީ ބަރު އެއްގަމު އުޅަނދުފަހަރު މަގުތަކުގައި ނުދުއްވުމަށާއި، މަގުމައްޗަށް ކުނި ނުނެރުމަށް ފުލުހުން އެދިއްޖެއެވެ.

ފުލުހުންގެ އިދާރާއިން ނެރުނު ބަޔާނުގައި ބުނީ، ބޯކޮށް ވާރޭވެހި މާލޭގެ މަގުތަކުގައި ފެންބޮޑުވެ، ބައެއް ގޭގެއަށް ފެން ވަނުމުގެ ހާދިސާތައް ހިނގަމުން ދާތީ، މަގުތަކުން ފެން ހިނދި އާންމު ހާލަތަށް މަގުތައް އަންނަންދެން، މަގުތަކަށް ކުނި ނުނެރުމަށާއި، ބަރު އުޅަނދުތަކާއި ހަތަރުފުރޮޅުލީ އުޅަނދު ޒަރޫރީ ބޭނުންތަކުގައި މެނުވީ ނުދުއްވުމަށް އަންގާކަމަށެވެ.

މީގެ އިތުރުން، މާލޭގެ މަގުތަކުގައި ފެންބޮޑުވުމާ ގުޅިގެން ގޭގެއަށާއި ފިހާރަތަކަށް ފެންވަދެ ލިބޭ ގެއްލުން ކުޑަ ކުރުމަށް ވެލިބަސްތާ ޖެހުންފަދަ މަސައްކަތްތަކުގައި ފުލުހުން ދަނީ ހަރަކާތްތެރިވަމުންކަމުގައިވެސް ފުލުހުންގެ އިދާރާއިން ވަނީ ބުނެފައެވެ.