މިއަދު މާލެއަށް ބޯކޮށް ވާރޭ ވެހުމުގެ ސަބަބުން މިހާތަނަށް 85 ތަނަކުން ފެންވަދެ ގެއްލުންތައް ލިބިގެން ރިޕޯޓްކޮށްފައިވާ ކަމުގައި ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ވިދާޅުވެއްޖެއެވެ.

އެއޮތޯރިޓީން ވިދާޅުވީ، މާލެއަށް މިއަދު ކުރި ވިއްސާރައިގައި، މިހާތަނަށް، 85 ތަނަށް ފެންވަދެފައިވާ ކަމަށާއި އޭގެ ތެރެއިން 7 ތަނެއްގައި މީހުންނަށް ދިރިނޫޅެވޭ ވަރަށް ފެންބޮޑުވެފައިވާ ކަމަށް ރިޕޯޓްކޮށްފައިވާ ކަމަށެވެ. އަދި ސިޓީކައުންސިލާއި ފުލުހުންނާއި އެމްއެންޑީއެފާއި ދިވެހިރެޑްކްރެސެންޓްގެ އެހީތެރިކަމާއިއެކު، ވެލިބަސްތާތައް ޖެހުމުގެ މަސައްކަތްތައްވެސް ކުރެވެމުންދާ ކަމުގައި އެންޑީއެމްއޭއިން ވަނީ ވިދާޅުވެފައެވެ.

އެމްއެންޑީއެފުން ވިދާޅުވީ، މާލޭގެ 8 ސަރަހައްދެއްގައި 14 ޕަންޕު ޖައްސައިގެން ފެން ހިންދުމުގެ މަސައްކަތް ސިފައިން މިހާރުވެސް ދަނީ ކުރަމުން ކަމަށެވެ. އޭގެތެރޭގައި އައިޖީއެމްއެޗް، އެސްޓީއޯ ފުށްގުދަން، ދިރާގު އޮފީސް، ވެސްޓް ޕާކް، ޖެލީ ޕިއްޒާ، ދަރުބާރުގެ، ފުޑްކޯޓްގެ އިތުރުން ބޮޑުވަޅު ހުންނަ ސަރަހައްދު ހިމެނޭއެވެ.

Advertisement

މިހާރު ކުރަމުންދާ ވިއްސާރަ އާއި ގުޅިގެން މިއަދު މޫސުމާއި ބެހޭ ޤައުމީ އިދާރާއިން ތިން ފަހަރެއްގެ މަތިން ޔެލޯ އެލާޓް ނެރެފައި ވާއިރު، މިހާރު އޮތީ، އެންމެ ދެކުނުގެ ހަތަރު އަތޮޅު ފިޔަވައި ރާއްޖޭގެ ހުރިހާ ސަރަހައްދަކަށް ޔެލޯ އެލާޓް ނެރެފައެވެ.