ވަޒީފާގެ ބިރުދައްކައިގެންނާއި، މީހުންނަށް ވަޒީފާތައް ދީގެން ރައްޔިތުންގެ މަޖިލީހުގެ އިންތިޚާބަށް ނުފޫޒު ފޯރުވުމަށް ހިންނަވަރު ދާއިރާގެ ކެމްޕޭނު ޖަލްސާގައި، ސަރުކާރު ކެންޑިޑޭޓްގެ ސަޕޯޓަރަކު ގޮވާލައި ހިންގި ޣައިރުޤާނޫނީ ޢަމަލަކީ، ފާޅުކުރި ޚިޔާލެއްގެ ގޮތުގައި ސިފަކޮށް، ވަކިފަރުދަކު ފާޅުކުރާ ޚިޔާލަކީ، ޕާޓީގެ ސިޔާސަތެއް ނޫންކަމަށް ޕީޕީއެމް ޕީއެންސީން ބުނެފިއެވެ.

އެއަމަލު ކުއްވެރިކޮށް އެމްޑީޕީން ނެރުނު ނޫސް ބަޔާނަށް ރައްދުދީ، ޕީޕީއެމް ޕީއެންސީން މިރޭ ނެރުނު ނޫސްބަޔާނުގައި ބުނެފައި ވަނީ، ރައްޔިތުންގެ މަޖިލީހުގެ އިންތިޚާބަށް ނުފޫޒު ފޯރުވުމަށް މިސަރުކާރުން ރައްޔިތުންނަށް ވަޒީފާގެ ބިރު ދައްކަމުން ގެންދާކަމަށް ބުނެ އެމްޑީޕީން ނެރެފައިވާ ބަޔާނަކީ، މުޅިން ހަޤީޤަތާއި ޚިލާފު ބަޔާނެއް ކަަމަށެވެ.

ޕީޕީއެމް ޕީއެންސީންގެ ބަޔާނުގައި ބުނީ، ސަރުކާރުން ރައްޔިތުންގެ ތާއީދާއި ލޯބި ހޯދާނީ ރައްޔިތުން އެދޭ ތަރައްޤީ ގެނެސްދީގެން އަދި ރައްޔިތުންގެ އަޑު އަހައިގެން ކަމަށެވެ. އަދި ސިޔާސީ ކަންކަމުގައި ބައިވެރިވާ ފަރާތްތައް ވަޒީފާއިން ވަކިކުރުމާއި ހައްޔަރު ކުރުމަކީ މިސަރުކާރުން ކުރާނެ ކަމެއް ނޫންކަމުގައިވެސް ޕީޕީއެމް ޕީއެންސީން ނެރެފައިވާ ބަޔާނުގައި ވަނީ ބުނެފައެވެ. އެބަޔާނުގައި އެގޮތަށް ބުނެފައި ވީނަމަވެސް ސަރުކާރުގެ ކުންފުނިތަކުގައި މަސައްކަތް ކުރާ މުވައްޒަފުން އިދިކޮޅު ކެންޑިޑޭޓުންނައް ތާއީދު ކުރުމުން، ވަޒީފާއިން ސަސްޕެންޑް ކުރުމާއި މަޤާމުދަށްކުރުމާއި އަދި ވަޒީފާއިން ވަކިކުރުމުގެ މައްސަލަތައް މިފާއިތުވި ދެމަސްދުވަހުގެ ތެރޭގައިވެސް ވަނީ ފެންމަތި ވެފައެވެ.

Advertisement

ރޭ ހިންނަވަރުގައި ޕީއެންސީން ބޭއްވި ޖަލްސާގައި ސަރުކާރުގެ ކެންޑިޑޭޓުންނަށް ވޯޓު ނުދޭ ސަރުކާރު މުވައްޒަފުންނާއި ކުންފުނިތަކުގެ ވަޒީފާތަކުން ވަކިކުރަން ގޮވާލާފައި ވަނީ، ހިންނަވަރު ދާއިރާއަށް ޕީއެންސީގެ ޓިކެޓްގައި ވާދަކުރާ ކެންޑިޑޭޓްގެ ކެމްޕޭނުގައި އިސްކޮށް މަސައްކަތް ކުރާ ހިންނަވަރު އަޅިވިލާގޭ، އަހުމަދު އަބްދުއްރަހުމާން (ހަންޓާ އަހުމަދު)އެވެ