ސަރުކާރުން މަޖިލިސް އިންތިހާބަށް ނުފޫޒުފޯރުވުމަށް ފާޅުގައި ވަޒީފާގެ ބިރުދައްކަމުން ގެންދާތީ އެމްޑީޕީން އެކަން ކުއްވެރިކޮށްފިއެވެ.

އެމްޑީޕީން ނެރުނު ބަޔާނުގައި ބުނީ، ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބުގައި ސަރުކާރު ހިންގާ ޕާޓީ ޕީޕީއެމް/ޕީއެންސީން ދަނީ ވަރަށް ފާޅުކަން ބޮޑުކޮށް ފުޅާދާއިރާއެއްގަ ސަރުކާރު މުވައްޒަފުން އެމީހުން ޕީއެންސީގެ ކެންޑިޑޭޓުންނަށް ވޯޓު ނުދޭނަމަ އެ މުވައްޒަފުންނަށް ވަޒީފާގެ ބިރުދައްކާ އަދި ސަރުކާރުގެ ކުންފުނިތަކަށް އޮފީސްތަކަށް މުވައްޒަފުން ނެގުންވެސް ޕީއެންސީގެ ކެންޑިޑޭޓުންނަށް ދޫކޮށްލުމަށް ގޮވާލަމުންދާ ކަމަށެވެ. އެހެންވެ ސަރުކާރުން ހިންގަމުންގެންދާ މިއަމަލުތައް އެންމެ ހަރުކަށި އިބާރާތުން ކުށްވެރިކުރާކަމުގައި އެމްޑީޕީން ވަނީ ބުނެފައެެވެ.

އެމްޑީޕީގެ ބަޔާނުގައި ވަނީ، މަޖިލިސް އިންތިހާބުގައި ހިންނަވަރު ދާއިރާއަށް ވާދަކުރާ ޕީއެންސީގެ ކެންޑިޑޭޓުގެ ކެމްޕެއިން ޖަލްސާގައި އިންތިޚާބަށް ނުފޫޒު ފޯރުވުމުގެ ގޮތުން ވާހަކަ ދައްކާފައި ވަނީ، އިލެކްޝަންސް ކޮމިޝަނުން އެ މައްސަލަ ސީރިއަސް މައްސަލައެއްގެ ގޮތުގައި ބެލުމަށްވެސް ގޮވާލާފައެވެ. 

Advertisement

އެމްޑީޕީން ބުނީ، މި އިންތިހާބުގެ ކެމްޕެއިންގައި ސަރުކާރުން ދަނީ ޕީއެންސީ ކެންޑިޑޭޓަށް ވޯޓު ނުދޭ މީހުން ނުހައްގުން ވަޒީފާތަކުން ވަކިކޮށް ޕީއެންސީ ކެންޑިޑޭޓަށް ވޯޓު ދޭނެ މީހުންނަށް ވަޒީފާތަކަށް ނަގަމުންކަން، ހިންނަވަރު ދާއިރާއަށް ވާދަކުރާ ޕީއެންސީ ކެންޑިޑޭޓުގެ ކެމްޕެއިން ޖަލްސާގައި ދެއްކި ވާހަކައިން ސާފުކޮށް އެނގިގެންދާ ކަމަށެވެ. މީގެ އިތުރުން ސަރުކާރުން ދަނީ މި ކެމްޕެއިންގައި ދައުލަތުގެ ވަސީލަތްތައް ވަރަށް ފާޅުގަ ނަހަމަގޮތުގައި ބޭނުންކުރަމުން ކަމުގައި އެމްޑީޕީން ބުނެފައިވެއެވެ. މިގޮތުން މިކަން ކަމުންވެސް އެނގިގެންދަނީ، އެއީ ސަރުކާރުން ރައްޔިތުންނަށް ހެދި ދޮގާއި އޮޅުވާލުންތައް ފަޅާއަރަމުންދާތީ ރައްޔިތުން އެކަމާ ދެކޮޅަށް މި އިންތިހާބުގައި ވޯޓު ދޭނެތީ ރައްޔިތުންނަށް ބިރު ދެއްކުމަށް ކުރާ ކަމެއްކަން ކަމަށެވެ.

އެމްޑީޕީން ވަނީ ރައްޔިތުންގެ ވޯޓު ހޯދުމަށް ސަރުކާރުން އެ މީހުންނަށް ވަޒީފާގެ ބިރު ނުދެއްކުމަށާއި އަދި އިލެކްޝަންސް ކޮމިޝަނުން މިކަން ވީހާވެސް އަވަހަށް ބަލައްވައި އެކަމާއި ގުޅިގެން އެޅެންހުރި ގާނޫނީ ފިޔަވަޅު އެޅުމަށްވެސް ގޮވާލާފައެވެ.