ހިންނަވަރުގައި ޕީއެންސީން ބޭއްވި ޖަލްސާގައި, ވަރަށް ފާޅުގައި ވަޒީފާގެ ބިރުދައްކައި، ރިޝްވަތާއި ކޮރަޕްޝަންގެ ޢަމަލުތައް ހިންގުމަށް ގޮވާލާފައިވާއިރު، ކޮމިޝަނަށް މައްސަލަ ލިބުމާއެކު އެކަމުގައި އަޅަންޖެހޭ ހުރިހާ ފިޔަވަޅެއް ކޮމިޝަނުން އަޅަމުން ގެންދާނެ ކަމުގައި އިލެކްޝަންސް ކޮމިޝަންގެ ރައީސް ފުވާދު ތައުފީޤު ވިދާޅުވެއްޖެއެވެ.

ރޭ ހިންނަވަރުގައި ޕީއެންސީން ބޭއްވި ޖަލްސާގައި އެކަމަށް ގޮވާލާފައި ވަނީ، ހިންނަވަރު ދާއިރާއަށް ޕީއެންސީގެ ޓިކެޓްގައި ވާދަކުރާ ކެންޑިޑޭޓްގެ ކެމްޕޭނުގައި އިސްކޮށް މަސައްކަތް ކުރާ ހިންނަވަރު އަޅިވިލާގޭ، އަހުމަދު އަބްދުއްރަހުމާން (ހަންޓާ އަހުމަދު) ވަޒީފާގެ ބިރު ދެއްކުމަށް ގޮވާލައި، ދައްކާފައިވާ ވާހަކަތަކުގެ ވީޑިއޯ ސޯޝަލް މީޑިއާގަިއ ދައުރުވަމުން އަންނައިރު، އެއީ ބަލައިގަނެވޭނެ ކަމެއް ނޫންކަމުގައި ވިދާޅުވެ އެކަން ކޮމްޕްލަޔަންސް ބިއުރޯއަށް ހުށައެޅުއްވުމަށް އިލެކްޝަންސް ކޮމިޝަންގެ ރައީސް ފުވާދު ތައުފީޤު ވަނީ އެދިވަޑައިގެންފައެވެ.

އިލެކްޝަންސް ކޮމިޝަންގެ ރައީސް ފުާދު ތައުފީޤު ނޫން.އެމްވީއަށް ވިދާޅުވީ، އެމައްސަލަ އިލެކްޝަންސް ކޮމިޝަނުން ބަލާނެ ކަމަށާއި، ކޮމިޝަންގެ ލީގަލް ޓީމާއި، ކޮމިޝަންގެ މެމްބަރު އެފަދަ ކަންކަމާއި ގުޅިގެން އަޅަންޖެހޭ ފިޔަވަޅުތައް ނާޅައި ދޫކޮށް ނުލާނެ ކަމަށެވެ.

Advertisement

ފުވާދު ވިދާޅުވީ، އިންތިޚާބަށް ނުފޫޒު ފޯރުވުމަށް ކުރާ މަސައްކަތަކީ ޤާނޫނީ ކުށެއް ކަމަށާއި، އެހެން ކަމުން އެންޓި ކޮރަޕްޝަން ކޮމިޝަނާއި ޕްރޮސެކިއުޓަރ ޖެނެރަލްގެ އޮފީހަށް މައްސަލަތައް ފޮނުވައި އެފަދަ ފަރާތްތަކާއި ދެކޮޅަށް ޝަރުޢީ ކޯޓުތަކުގައި ދަޢުވާ ކުރެވޭނެ ކަމަށެވެ.

ފުވާދު ވިދާޅުވީ، ކެންޑިޑޭޓަކު އެފަދަ އަމަލެއް ކޮށްފިނަމަ، އެކަމުގެ ކުޑަބޮޑު މިނަށް ބަލައި، އެ ކެންޑިޑޭޓެއްގެ ކެންޑިޑެންސީ ބާޠިލްކުރުމުގެ އިޙްތިޔާރާއި ބާރުވެސް އިލެކްޝަންސް ކޮމިޝަނަށް ލިބުގެންވާކަމަށެވެ. 

ރައްޔިތުންގެ މަޖިލީހުގެ އިންތިޚާބު މިމަހުގެ 21 ވަނަ ދުވަހު ބޭއްވުމަށް ހަމަޖެހިފައި ވާއިރު، މަޖިލިސް އިންތިޚާބުގައި ސަރުކާރަށް މެޖޯރިޓީ ހޯދުމަށް ދައުލަތުގެ ވަސީލަތްތައް ނުހަމަ ގޮތުގައި ބޭނުން ކުރުމާއި، ވަޒީފާގެ ބިރު ދެއްކުންފަދަ ކަންކަން ވަނީ އިތުރުވެގެން ގޮސްފައި ކަމުގައި ހުރިހާ ފަރާތްތަކަކުންވެސް ފާހަގަ ކުރެއެވެ.

ހުސްވި ޑިސެމްބަރު މަހުގެ ތެރޭގައި އެމްޑީޕީގެ 13 މަޖިލިސް މެމްބަރަކު ޕީއެންސީއަށް ސޮއެކުރި އިރު އެމެމްބަރުން އެޕާޓީއަށް ގެންދިޔައީވެސް ނާޖާއިޒު މަންފާތަކާއި ފައިސާ ހުށައަޅައިގެން ކަމުގައި އިދިކޮޅު ފަރާތްތަކުން ބުނެފައިވެއެވެ.