ރައްޔިތުންގެ މަޖިލީހުގައި ސަރުކާރާއި ޚިޔާލު ތަފާތު މެމްބަރުން ތިބެގެން ތަރައްޤީ ނުގެނެވޭނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ހަވީރު އައްޑޫ ސިޓީއަށް ވަަޑައިގެން މިރޭ އައްޑޫ ސިޓީ ހައިސްކޫލުގައި އައްޑޫގެ ދާއިރާތަކަށް ވާދަކުރާ ކެންޑިޑޭޓަކުންނާއި ރައްޔިތުންނާއި އެކު ބޭއްވި ބައްދަލުކުރެއްވުމުގައެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ، އެމަނިކުފާނުގެ ސަރުކާރުގެ މިވީ ހަތަރު މަސްދުވަހުގެ ތެރޭގައި ތަރައްޤީގެ މަޝްރޫއުތައް ކުރިޔަށް ނުގޮސްގެން އުޅެނީ ސަރުކާރަށް މަޖިލީހުގެ މެޖޯރިޓީ ނެތުމުން ކަމަށެވެ. އެހެންވެ މަޖިލީހުގެ މެޖޯރިޓީ ނެތި ސަރުކާރަށް ތަރައްޤީގެ މަޝްރޫއުތައް ނުހިންގޭނެ ކަމަށާއި އެހެންކަމުން، ޗޮއިސް އޮތީ ރައްޔިތުންގެ އަތްމަތީގައި ކަމުގައި އެމަނިކުފާނު ވިދާޅުވިއެވެ.

Advertisement

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އައްޑޫ ސިޓީގެ ތަރައްޤީ ކަށަވަރުވާނީ، ސަރުކާރުން ދައްކާ 8 މެމްބަރުން ހޮވައިގެން ކަމަށެވެ.

ރައީސް ޑރ. މުހައްމަދު މުއިއްޒުގެ ވާހަކަފުޅުގައި ވިދާޅުވީ، އެމަނިކުފާނުގެ ވިސްނުންފުޅަކީ ދައުރުގެ ފަހިކޮޅުގައި މަޝްރޫޢުތައް ފެށުމުގެ ބަދަލުގައި ވީހާވެސް އަވަހަށް މަޝްރޫއުތައް ފެށުން ކަމަށެވެ. މިގޮތުން މިވީ ހަތަރު މަސްދުވަހުގެ ތެރޭގައި އައްޑޫގައި ގިނަ މަސައްކަތްތަކެއް ފެށި އަދި ބައެއް މަސައްކަތްތައް ފެށުމަށް ތައްޔާރުވެފައިވާ ކަމަށެވެ. މިގޮތުން އައްޑޫ ބުރިޖުގެ މަސައްކަތް ފެށިފައިވާ ކަމަށާއި، މިއަހަރު ނިމުމުގެ ކުރިން ބުރިޖު އެޅުމުގެ އަމަލީ މަސައްކަތް ފެށޭނެ ކަމުގައިވެސް ވިދާޅުވިއެވެ. މީގެ އިތުރުން، ފެނާ ނަރުދަމާގެ އަޕްގްރޭޑް ކުރުމުގެ މަސައްަކަތް އަންނަ ހަފްތާގައި ހަވާލު ކުރެވޭނެ ކަމުގައިވެސް ވިދާޅުވިއެވެ.