މިއަދު ކުއްލި ގޮތަކަށް ނިޔާވި އިބްރާހިމް ރަޝީދު (ހޯރަ އިއްބެ)ގެ އާއިލާއަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަޢުޒިޔާ ވިދާޅުވެއްޖެއެވެ.

ރައީސް ޞާލިޙް އެމަނިކުފާނުގެ ތަޢުޒިޔާގެ މެސެޖުގައި ވިދާޅުވީ،  އިބްރާހީމް ރަޝީދު (ހޯރަ އިއްބެ) އަކީ ރާއްޖޭގައި ޑިމޮކްރަސީ ޤާއިމުކުރުމަށް ފެށި ދަތުރުގެ މުހިއްމު ބައިވެރިއެއް ކަމަށެވެ. އަދި އެއީ އެމްޑީޕީ އަށް ގިނަގުނަ އެހީތެރިކަން ފޯރުކޮށްދެއްވި އިހްލާސްތެރި ހިދުމަތްތެރިއެއް ކަމަށާއި ޕާޓީ އުފެދިގެން އައި އިރު ޕާޓީގެ ޕޯޑިއަމްއަށް ވަރަށް ފަރިތަ މޫނެއްކަމުގައިވެސް ރައީސް ޞާލިޙް ވިދާޅުވިއެވެ. 

މީގެ އިތުރުން އިބްރާހިމް ރަޝީދަކީ، ކުޅަދާނަ ލިޔުންތެރިއެއް އަދި އެހާމެ ހުނަރުވެރި ވާހަކަދެއްކުންތެރިއެއްކަންވެސް ރައީސް ޞާލިޙްގެ މެސެޖުގައި ވަނީ ފާހަގަކުރައްވާފައެވެ.

Advertisement

ކުއްލި ގޮތަކަށް އިބްރާހީމް ރަޝީދު މިއަދު ނިޔާވީ، މިއަދު މެންދުރުކުރީގައި އިންދިރާގާނދީ މެމޯރިއަލް ހޮސްޕިޓަލްގައެވެ. އިބްރާހީމް ރަޝީދުގެ ޖަނާޒާ އޮންނާނީ މާދަމާ ހުޅުމާލެ ސަހަރާގައެވެ. މިގޮތުން މާދަމާ ހެނދުނު 8:30 އިންފެށިގެން މޫނު ދެއްކުން ކުރިޔަށްދާނެ ކަމަށާއި، ކަށުނަމާދު އޮންނާނީ މާދަމާގެ ޢަޞުރު ނަމާދަށް ފަހުގައި، ހުޅުމާލެ ސަހަރާ މިސްކިތް، މަސްޖިދުއް ޒައިދު ބިން ޘާބިތުގައެވެ.