މިސަރުކާރުން ލާމަރުކަޒީ ނިޒާމް ފުނޑު ފުނޑުކޮށްލާނެ ކަމުގެ ކުލަ ވަރަށް ސާފުކޮށް ފެންނަމުން އެބަދާ ކަމުގައި، އެމްޑީޕީގެ ޗެއާޕަރސަން ފައްޔާޒް އިސްމާއިލް ވިދާޅުވެއްޖެއެވެ.

އެމްޑީޕީގެ މަޖިލިސް ކެމްޕޭނުގެ ތެރެއިން، ރޭ ފޭދޫގައި ބޭއްވި ހަރުގެ ޖަލްސާގައި ވާހަކަފުޅު ދައްކަވަމުން ފައްޔާޒު ވިދާޅުވީ، މިސަރުކާރުން ވަނީ އެޓޯލް މިނިސްޓްރީ އެއް އުފައްދާފައި ކަމަށާއި، އަދި އެމިނިސްޓްރީ އުފައްދަވައި މާގިނަ ދުވަސްތަކެއް ނުވެ އެމިނިސްޓްރީގެ ދަށަށް ޔޫތު ސެންޓަރުތައް ގެންދަން ފަށާފައިވާ ކަމަށެވެ. މީގެ އިތުރުންވެސް ކައުންސިލްތަކުގެ އިހްތިސާސްތަކުގެ ތެރޭގައި ހުރި ބާރުތައް އެމިނިސްޓްރީގެ ދަށަށް ގެންދާއިރު، ކައުންސިލްތަކާއި ހަވާލުވެވޭ ކަންކަމުގެ ގޮތުގައި އެމިނިސްޓްރީން އަންގާ ކަންކަން ކޮށްލައިގެން ތިބޭ ގޮތަށް ކަންކަން ފަހިކުރަމުންދާކަން ފައްޔާޒުގެ ވާހަކަފުުޅުގައި ފާހަގަކުރެއްވިއެވެ.

ފައްޔާޒު ވިދާޅުވީ، އޭރު ސަސްޕެންޑްކުރި ކައުސިލަރުންގެ އަަދަދު ގިނަކަމުން އެއަދަދު އެހެން މީހުންނެކޭ އެއްފަދައި އެމަނިކުފާނުގެވެސް ހަނދުމަފުޅުގައި ނެތް ކަމަށެވެ. މީގެ އިތުރުން ރައީސް ޞާލިޙް 5 އަހަރު ވެރިކަމުގައި ކަންތައް ކުރެއްވި ގޮތް ރަނގަޅުވުމުން ކުރީގެ އެކަންކަން ހަނދާން ނެތިގެން ދިޔައީ ކަމުގައިވެސް ފައްޔާޒު ވަނީ ވިދާޅުވެފައެވެ.

ރައީސުލްޖުމްހޫރިއްޔާ ޑރ. މުއިއްޒު ދައްކަވަމުން ގެންދަވާ ވާހަކަފުޅުތަކުގައި ހައްދަވަމުން ގެންދަވަނީ މުޅިންވެސް އިތުރުފުޅުގައި ކަމުގައި ފައްޔާޒު ވިދާޅުވިއެވެ. މިގޮތުން ފައިސާ ޗާޕް ނުކުރައްވާނެކަމަށް ތަކުރާރުކޮށް ވިދާޅުވާ ވާހަކަފުޅާއި މެދު ބިރުގަންނަންޖެހޭ ކަމަށާއި، އެކަން ކުރައްވާނީ އެއާއި އިދިކޮޅަށްކަން އެއީ ޔަޤީންވާ ކަމެއް ކަމުގައި ފައްޔާޒް ވިދާޅުވިއެވެ. 

ފައްޔާޒް ވިދާޅުވީ، މިސަރުކާރުން ފައިސާ ޗާޕްކުރާނޭކަން އެއީ ކަށަވަރުވާ ކަމެއް ކަމަށާއި، އެކަން ކުރާ މަންޒަރު ރައްޔިތުންނަށް އަދި ފެންނާނެކަމަށެވެ.