އައްޑޫ ސިޓީން އެމްޑީޕީއަށް މިފަހަރުވެސް އާނބަސް ބުނާ މަންޒަރު ފެނިވަޑައިގަންނަވާކަމުގައި ކުރީގެ ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އެމްޑީޕީގެ މިސްރާބު ހަމަމަގަށް ކެމްޕޭނުގެ ތެރެއިން ރޭ އައްޑޫ ސިޓީ ފޭދޫގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޞާލިޙް ވިދާޅުވީ، އެމްޑީޕީ އާއެކު އައްޑޫ ސިޓީގެ ރައްޔިތުން ނުވާންވީ ސަބަބެއް ނެތް ކަަމަށެވެ. އެމަނިކުފާނު ވިދާޅުުވީ، އައްޑޫ ސިޓީގެ ރައްޔިތުންވެސް ޤަބޫލުކުރާ ފަދައިން މިހާތަނަށް، އައްޑޫ ސިޓީގެ ތަރައްޤީއަށްޓަކައި، ރައްޔިތުން އިންތިޚާބު ކުރި ސަރުކާރަކުން، މިހާތަނަށް ކޮށްފައި ނުވާވަރުގެ މަސައްކަތްތަކެއް އެމްޑީޕީން ވެރިކަމަށް އަންނަ ކޮންމެ ފަހަރަކު ކުރެވިފައިވާ ކަމަށެވެ.

Advertisement

މީގެ އިތުރުން ރައީސް ޞާލިޙްގެ ވާހަކަފުޅުގައި، މިދިޔަ ރިޔާސީ އިންތިޚާބުގައި އައްޑޫ ސިޓީގެ ރައްޔިތުން އެމްޑީޕީގެ ސިޔާސަތުތަކަށް ތާއީދުކޮށްފައިވާކަންވެސް ވަނީ ފާހަގަކުރައްވާފައެވެ.

ރައީސް ޞާލިޙް އިތުރަށް ވިދާޅުވީ، މިހާރު ވެރިކަމުގައި ތިބި ބޭފުޅުން އިންތިޚާބުކޮށް ހެދުނު ގޯސް ރަނގަޅު ކުރެވެން އޮތީ ދެން ރައްޔިތުންގެ މަޖިލީހުގެ ތެރެއިން ކަމަށާއި، ރައްޔިތުންގެ މަޖިލީހުގެ އަޣުލަބިއްޔަތު އެމްޑީޕީން ބޭނުންވަނީ އެސަބަބަށްޓަކައި ކަމަށެވެ.

މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބު އޮންނާނީ މިމަހުގެ 21ވާ އާދިއްތަ ދުވަހުގައެވެ. އިންތިޚާބަށް ފޯރީގައި އެމްޑީޕީން ދަނީ ކެމްޕޭން ކުރަމުންނެވެ.