އާއިލާގެ ބަޔަކާއި އެކު އިއްޔެ ދަތުރުގޮސް އުޅެނިކޮށް މަރުވި، ކުޑަކުއްޖާގެ ހަށިގަނޑު ތަޙްޤީޤަށް މާލެ ގެނައުމަށް ފަހުގައި، ރޭ ފަތިސް ނަމާދަށްފަހު ވަޅުލައިފިއެވެ.

އާއިލާގެ މީހުންނާއި އެކު، ތ. ވިލުފުއްޓާއި ގާތުގައި، އޮންނަ، ތ.ރަކީފުއްޓަށް ދަތުރުގޮސް އުޅެނިކޮށް ނިޔާވި، ކުއްޖާގެ ހަށިގަނޑު ފުލުހުން މާލެ ގެނެސްފައި ވަނީ ރޭ އިރާކޮޅުގައެވެ. އެކުއްޖާގެ ޖަނާޒާ ބާއްވައި، ހަށިގަނޑު ހުޅުމާލެ ސަހަރާގައި ވަޅުލާފައި ވަނީ ރޭގެ ފަތިސް ނަމާދަށް ފަހުގައެވެ. ކުޑަކުއްޖާ މަރުވި ހާދިސާ ތަޙްޤީޤު ކުރަމުންދާކަމުގައި ވިދާޅުވުން ފިޔަވައި އެކަމާއި ގުޅޭ ގޮތުން އިތުރު ތަފްސީލެއް ފުލުހުން ހާމައެއް ނުކުރެއެވެ.

އިއްޔެ ހިނގި ހާދިސާގައި ނިޔާވެފައި ވަނީ، ގ. ހިލާލު ޢާއިޝަތު ޝައިމާ (16އ) އެވެ. ވިލުފުށީގައި ޝައިމާ ކުޑައިރުންފެށިގެން ދިރިއުޅެމުން އައީ އޭނާގެ މާމަ އާއި މަންމަފަރާތުގެ އާއިލާގެ މީހުންނާއި އެކުގައެވެ. ޝައިމާ ތައުލީމު ޙާސިލްކުރަމުން ދިޔައީ، ވިލުފުށީ ސްކޫލުގައެވެ.

Advertisement

ޝައިމާ ނިޔާވި ހާދިސާ ހިނގީ އާއިލާ މީހުންނާއި އެކު ދަތުރުގޮސް އުޅެނިކޮށެވެ.

ހާދިސާގެ މައުލޫމާތު އެނގޭ ބައެއް މީހުން ބުނީ، ކުއްޖާ މަރުވީ މޫދު ތެރޭގައި އުޅެނިކޮށް ފިޓުޖެހިގެން ކަމަށް ބެލެވޭ ކަމަށެވެ. އަދި ކުރިންވެސް އެކުއްޖާއަކީ ފިޓުޖެހޭ ކުއްޖެއް ކަމުގައިވެސް މައުލޫމާތު ލިބިފައިވެއެވެ.

އެކުއްޖާ އެހެންކުދިންތަކަކާއި އެކު މޫދަށް އެރި ކުޅެ އުޅުމުގެ ތެރޭގައި މާގިނަ އިރު ބަންޑުން މޫދުތެރޭގައި އޮތުމައި، އަދި ގޮނޑުދޮށުގެ އާނުގަނޑުމައްޗަށް ރާޅާއެކު ލައްވުމުން ކުއްޖާގެ ހަރަކާތް ހުއްޓިފައިވާކަން ފާހަގަކުރެއްވި އެކުއްޖާ ނެގީ އެމީހުންނާއި އެކު ދަތުރުގޮސް އުޅުނު މީހަކަށް ފެނިގެންކަމަށްވެއެވެ.

ފުލުހުންގެ އިދާރާއިން ވިދާޅުވީ، ކުއްޖަކު ގެނބިގެން، ވިލުފުށީ ޞިއްޙީމަރުކަޒަށް ގެންނަ ކަމުގެ ރިޕޯޓު ލިބުނީ އިއްޔެގެ 12:45 ގައި ކަމަށެވެ.