Advertisement
ރައީސް ޑރ. މުޢިއްޒު، މާވަށު ކައުންސިލާއި ބައްދަލުކުރެއްވުން --- ފޮޓޯ: ރައީސް އޮފީސް
މާވަށުގައި އެއާޕޯޓު އަޅައިދޭން އެދިއްޖެ
ހައްދުންމަތީގައި ސަރުކާރުން ދެވަނަ އެއާޕޯޓެއް އަޅާނަމަ ، އެ އެއާޕޯޓު މާވަށުގައި އަޅައިދިނުމަށް، މާވަށު ކައުންސިލުން ރައީސުލްޖުމްހޫރިއްޔާއަށް ދަންނަވައިފިއެވެ.
ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ހައްދުންމަޗާއި އައްޑުއަތޮޅަށް ފެއްޓެވި ދަތުރުފުޅުގައި މިއަދު ވަޑައިގެންނެވީ، އެންމެ ފުރަތަމަ ލ. މާވަށަށެވެ.
މާވަށުގައި އެރަށު ކައުންސިލާއި، އތ.މ ކޮމިޓީއާ ރައީސުލްޖުމްހޫރިއްޔާ ވަނީ ބައްދަލުކުރައްވާފައެވެ.
ރައީސުލްޖުމްހޫރިއްޔާ ބޭއްވެވި މިބައްދަލުކުރެއްވުމުގައި، މާވަށު ކައުންސިލުން ވަނީ ހައްދުންމަތީގައި ދެވަނަ އެއަރޕޯޓެއް ޤާއިމުކުރާނަމަ މާވަށުގައި އެ އެއަރޕޯޓު ޤާއިމުކޮށްދެއްވުމަށް އެދިވަޑައިގެންފައި ކަމުގައި ރައީސުލްޖުމްހޫރިއްޔާގެ އޮފީހުން ވަނީ ވިދާޅުވެފައެވެ.
މާވަށަކީ، ހައްދުންމަތީގެ އެހެންރަށްރަށާއި އެކަހެރިކޮށް އޮންނަ އަތޮޅުގެ ހުޅަނދު ދުނީގައި ހިމެނޭ ރަށެކެވެ. ހައްދުންމަތީގައި އަޅާފައިވާ ފުރަތަަމަ އެއާޕޯޓަކީ، މިހާރު އަސްކަރީ އެއާޕޯޓަކަށް ބަދަލުކޮށްފައިވާ ކައްދޫ އެއާޕޯޓެވެ. ކައްދޫ އެއާޕޯޓުގެ އިތުރުން އެއަތޮޅު މެންދޫގައި އިތުރު އެއާޕޯޓެއް ތަރައްޤީކުރުމަށް ކުރީގެ ސަރުކާރުތަކުގައި މަޝްވަރާކޮށްފައިވެއެވެ.
މިސަރުކާރުން، މިއަހަރުގެ މާރިޗު މަހު، އިތުރު 09 ރަށެއްގައި އެއާޕޯޓު އަޅަން އިއުލާނުކޮށްފައި ވާއިރު، ހައްދުންމަތީގައި އިތުރު އެއާޕޯޓެއް އެޅުމަށް ނިންމާފައިވާ ކަމުގައި އިއުލާނު ކުރި ނަމަވެސް ދެވަނަ އެއާޕޯޓު އަޅާނެ ރަށެއް ކަނޑައަޅާފައެއް ނުވެއެވެ.
