ރައްޔިތުންގެ މަޖިލީހުގެ އިންތިޚާބަށް ވަގުތު ކުޑަތަންވަމުން އަންނައިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައްދުންމައްޗާއި އައްޑޫ ސިޓީއަށް ކުރައްވާ ރަސްމީ ދަތުރުފުޅެއް މިއަދު ފައްޓަވައިފިއެވެ.

ރައީސުލްޖުމްހޫރިއްޔާގެ އޮފީހުން، ހާމަކޮށްފައިވާ ގޮތުގައި ރައީސުލްޖުމްހޫރިއްޔާގެ މި ދަތުރުފުޅަކީ، ރަސްމީ ދަތުރުފުޅެކެވެ. އެހެން ނަމަވެސް މިދަތުރުފުޅުގައި އެމަނިކުފާނު ކުރައްވާނެ ރަސްމީ ކަންކަމުގެ ގޮތުގައި، އެއޮފީހުން ފާހަގަކުރައްވާފައި ވަނީ، އެ ރަށްރަށުގެ ރައްޔިތުންނާއި ކައުންސިލްތަކާއި އ.ތ.މ. ކޮމިޓީތަކާ ބައްދަލުކުރައްވައި، އެރަށްރަށުގެ ތަރައްޤީއަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން މަޝްވަރާ ކުރެއްވުން ކަމަށެވެ.

މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވާއިރު، އެރަށްރަށް ހިމެނޭ ދާއިރާތަކަށް ރައްޔިތުންގެ މަޖިލީހުގެ އިންތިޚާބުގައި ސަރުކާރު ހިންގާ ޕީއެންސީގެ ޓިކެޓްގައި ވާދަކުރައްވާ ފަރާތްތަކުންވެސް ބައިވެރިވަމުން ދެއެވެ. އަދި ރައްޔިތުންނާއި ބައްދަލުކުރައްވައި ދައްކަވާ ވާހަކަފުޅުތަކާއި ކައުންސިލްތަކާއި އ.ތ.މ ކޮމިޓީތަކާއި އެކު ބާއްވަވާ ބައްދަލު ކުރެއްވުންތަކުގައި ސަރުކާރަށް މަޖިލިސް ހޯދުމަށް ރައީސް ޑރ. މުއިއްޒު ގެންދަވަނީ ކެމްޕޭން ކުރައްވަމުންނެވެ.

ރައީސް އޮފީހުން ހާމަކުރައްވާ ގޮތުގައި، ރައީސް ޑރ. މުއިއްޒުގެ މިދަތުރުފުޅުގައި މިއަދު ލ އަތޮޅުގެ ރަށްރަށަށް ޒިޔާރަތް ކުރެއްވުމަށްފަހުގައި މާދަމާ ވަޑައިގަންނަވާނީ އައްޑޫ ސިޓީއަށެވެ.

އައްޑޫ ސިޓީއަށް މިއަދު ކުރީގެެ ރައީސް އިބްރާހީމް މުޙައްމަދު ޞާލިޙްވެސް ވަނީ ވަޑައިގެންފައެވެ.