ސަރުކާރުގެ ކުންފުނިތައް ބަނގުރޫޓުވެފައިވާކަމަށާއި، ސަރުކާރުގައި ފައިސާ ނެތް ވާހަކަ ދެއްކުމަށްފަހު، މިސަރުކާރުން އަންނަނީ ސިޔާސީ މަޤާމުތައް އުފައްދައިގެން އެތައް ސަތޭކަ ބަޔަކަށް ވަޒީފާ ދެމުން ކަމުގައި ކުރީގެ ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

މިސްރާބު ހަމަމަގަށް، އެމްޑީޕީގެ ކެމްޕޭން ހަރަކާތުގެ ތެރެއިން ފުވައްމުލަކުގައި ބޭއްވި އެއްވުމުގައި ވާހަކަފުޅު ދައްކަވަމުން ރައީސް ޞާލިޙް ވަނީ، މަޖިލިސް އިންތިޚާބު ކުރިމަތިވަމުން އަންނަ މިވަގުތުގައި ސަރުކާރުން އެތައް ސަތޭކަ ބަޔަކަށް ސިޔާސީ މަޤާމުތަކާއި ވަޒީފާތައް ދެމުން އަންނަކަން ފާހަގަކުރައްވާފައެވެ.

ރައީސް ޞާލިޙް ވަނީ، ތަރައްޤީގެ މަޝްރޫޢުތައް ސަރުކާރަށް ނުހިންގިގެން އުޅެނީ ކީއްވެތޯ ސުވާލު ކުރައްވާފައެވެ. އެމަނިކުފާނު ވިދާޅުވީ ސިޔާސީ މަޤާމްތައް އުފައްދައި މުސާރަ ދެވޭނީ ފައިސާ ހުރެގެން ކަމަށެވެ. އަދި ސަރުކާރުގެ ރިކަރަންޓް ޚަރަދުވެސް ބޮޑުވެގެން ދާނީ ފައިސާ ހުރެގެން ކަމުގައި، އެމަނިކުފާނު ވިދާޅުވިއެވެ.

ރައީސް ޞާލީޙް ވިދާޅުވީ، ސަރުކާރުގެ ކުންފުނިތަކަށް މުވައްޒަފުން އިތުރު ކުރަމުންދާއިރު އެކަން ކުރެވޭނީ ފައިސާ ހުރެގެން ކަމަށެވެ. އެެހެން ކަމުން ދައްކާ ވާހަކައާއި އަމަލާއި ދިމާވާން އެބަޖެހޭ ކަމުގައި ރައީސް ޞާލިޙް ވިދާޅުވިއެވެ.

މިސަރުކާރު ވެރިކަމަށް އައުމަށްފަހުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެންމެ ބޮޑަށް ދައްކަމުން އައި އެއް ވާހަކައަކީ، ދައުލަތުގެ ދަރަނީގެ ވާހަކައެެވެ. މިގޮތުން ސަރުކާރާއި ކުންފުނިތައް އޮތީ ބަނގުރޫޓުވާ ހާލަތުގައި ކަމުގައި، ވިދާޅުވި ނަމަވެސް ފެންނަމުން ދަނީ، ސަރުކާރުން ކުރަމުން އަންނަ އިސްރާފު ޚަރަދުތައް އިތުރުވެފައިވާ މަންޒަރު ކަމަށް އިދިކޮޅު ސިޔާސީ ފަރާތްތަކުން ބުނެއެވެ.