ރައީސް ޔާމީނުގެ ދަރިކަލުން ޒެއިން ޢަބުދުﷲ ޔާމީން އިސްވެ ހުންނަަވައި އުފައްދަވާ ސިޔާސީ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދުމަށް ޣިޔާޘުއްދީން ސްކޫލު ހޯލުގައި ބާއްވަން އުޅުނު ޖަލްސާއަށް ހުރަށް އަޅައި ފުލުހުން ހުއްޓުވުމުން، ރާޅުގަނޑުގައި އެޖަލްސާ ބާއްވައި ޕާޓީ އުފެއްދުމުގެ ކަންކަން ފުރިހަމަކޮށްފިއެވެ.

ޕީއެންއެފްއިން މިރޭ ބޭއްވި ޖަލްސާގައި ވަނީ އެޕާޓީގެ ވަގުތީ ރައީސްގެ މަޤާމަށް ޒެއިން ޢަބުދުﷲ ޔާމީން ޢަބުދުލްޤައްޔޫމް އެޕާޓީގެ ވަގުތީ ރައީސްގެ މަޤާމަށް ޢައްޔަނުކޮށްފައެވެ. ޕާޓީ އުފެއްދުމުގައި އިސްކޮށް ހަރަކާތްތެރިވި ކުރީގެ ވަޒީރު މުހައްމަދު މަލީޙް ޖަމާލު ވިދާޅުވީ، ޕާޓީ އުފެއްދުމުގެ ޖަލްސާގައި ފުރިހަމަކުރަންޖެހޭ ކަންކަން ކުރެވިފައިވާ ކަމަށާއި، އެޖަލްސާގައި އިލެކްޝަންސް ކޮމިޝަންގެ އޮބްޒަވަރުންވެސް ބައިވެރިވި ކަމަށެވެ.

ޕީއެންއެފް އުފެއްދުމުގެ ޖަލްސާ ފުރަތަަމަ ބާއްވަން ހަމަޖައްސައި ތައްޔާރު ކުރީ، ޣިޔާޘުއްދީން ސްކޫލް ހޯލު ނަމަވެސް ފަހުން އެސްކޫލުން ވަނީ އެޖަލްސާ އެސްކޫލު ހޯލުގައި ބާއްވަން އެއްބަސްވި އެއްބަސްވުން ކެންސަލްކޮށް، އެޖަލްސާ ބޭއްވުން ހުއްޓުވުމަށް އެޑިޔުކޭޝަން މިނިސްޓްރީގައި އެދިފައި ކަމަށާއި، ފުލުުހުން ސްކޫލަށް ވަނީ އެހެންވެ ކަމަށް ފުލުހުންގެ އިދާރާއިން ވަނީ ބުނެފައެވެ. އެހެން ނަމަވެސް މިހާތަނަށްވެސް ސާފު ނުވެ އޮތް ކަމަކީ، ޣިޔާޘުއްދީން ސްކޫލުގެ ހޯލު ޕީއެންއެފްއަށް ދިނުމަށް ނިންމުމަށްފަހު އެނިންމު ބަދަލު ކުރި ސަބަބެކެވެ. އެކަމާއި ގުޅޭ ގޮތުން މިހާތަނަށް އެސްކޫލުން އެއްޗެއް ބުނެފައެއް ނުވެއެވެ.

ޕީއެންއެފްގެ މެމްބަރުންނާއި ސަޕޯޓަރުން ޣިޔާޘުއްދީނުން ނުކުމެގެން ރާޅުގަނޑަށް އައިސް ބްރިޖް ޕްލެޓްފޯމް ސަރަހައްދުގައި ޖަލްސާ ބޭއްވީ މިރޭ ދަންވި ފަހުންނެވެ. ޖަލްސާ ނިމުނު ވަގުތު އެތަނަށް، ކުރީގެ ރައީސް ޢަބުދުﷲ ޔާމީންވެސް ނުކުންނަވައި އެމަނިކުފާނުގެ ސަޕޯޓަރުންނާއި ޕީއެންއެފްގެ އިސްބޭފުޅުންނާއި، އަދި އެޕާޓީގެ ވަގުތީ ރައީސް ކަމުގެ މަޤާމަށް އިންތިޚާބު ކުރި އެމަނިކުފާނުގެ ދަރިކަލުން ޒެއިން އާވެސް ބައްދަލުކުރެއްވިއެވެ.

ޤާނޫނާއި އެއްގޮތަށް ސިޔާސީ ހަރަކާތްތައް ބާއްވަން ސަރުކާރުން ހުރަސް ނާޅާކަމަށް ބުނެ ރައީސުލްޖުމްހޫރިއްޔާގެ އޮފީހުންނާއި، ފުލުހުންގެ އިދާރާއިންވެސް ވަނީ ބަޔާނެއް ނެރެފައެވެ.