ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫނު ޢަބުދުލް ޤައްޔޫމާއި ޢީދު ސަލާމްކުރެއްވުމަށް ބޭނުންފުޅުވާ ފަރާތްތަކަށް އެފުރުޞަތު ހުޅުވާލައްވައިފިއެވެ.

ރައީސް މައުމޫނު އެކްސްގައި ލިޔުއްވި ޕޯސްޓެއްގައި ވިދާޅުވީ، ޢީދު ސަލާމް ކޮށްލެއްވުމަށާއި އެމަނިކުފާނާއި  ބައްދަލުކޮށްލެވުމަށް ބޭނުންފުޅުވާ ބޭފުޅުންނަށް  އީދު ދުވަހު ވަގުތުކޮޅެއް ހުސްކުރެއްވުމަށް ނިންމަވާފައިވާ ކަމަށެވެ. މިގޮތުން އެމަނިކުފާނާއި އީދު ސަލާމް ކުރެއްވުމަށް ބޭނުންފުޅުވާ ފަރާތްތަކަށް، ހެނދުނު 9:30 އިން 11:00އަށް އެންދެރިމާގޭގައި ބައްދަލު ކުރައްވާނެ ކަމުގައި ވިދާޅުވިއެވެ.

ރައީސް މައުމޫނަކީ، 11 ނޮވެމްބަރު 1978 އިން 11 ނޮވެމްބަރު 2008އަށް ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ މަޤާމު ފުރުއްވައި، ދިވެހި ރައްޔިތުންގެ ގިނަ ބައެއްގެެ ލޯތްބާއި އިޙްތިރާމް ހޯއްދަވާފައިވާ ބޭފުޅެކެވެ. އެމަނިކުފާނުގެ ވެރިކަމުގައިވެސް ކޮންމެ ޢީދަކާއި ގުޅުވައިގެން ޢީދު ސަލާމް ކުރެއްވުން ބާއްވަމުން ގެންދެވިއެވެ.

ރައީސް މައުމޫނު ވަނީ، މިޢީދުގެ ހެޔޮއެދުމާއި ތަޙްނިޔާވެސް ދިވެހި ލޮބުވެތި އެންމެހާ ރައްޔިތުންނަށް ފޮނުއްވާފައެވެ.