މާލެއަތޮޅުގައި ހިމާޔަތްކޮށްފައިވާ ސަރަހައްދުތަކުން ބިން ހިއްކުމަށް ވެލި ނެގޭ ގޮތަށް ޤަވާއިދަށް ގެނައި އިސްލާޙާއި މެދު އެމްޑީޕީން ކަންބޮޑުވުން ފާޅުކޮށްފިއެވެ.

އެމްޑީޕީގެ ފަރާތުން ބާއްވަމުން އަންނަ ސިލްސިލާ ނޫސްވެރިންގެ ބައްދަލުވުންތަކުގެ ތެރެއިން، ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި، އެމްޑީޕީގެ މަޖިލިސް ކެންޕޭންގެ ސްޕޯކްސްޕަރސަން އަދި ރައްޔިތުންގެ މަޖިލިހުގެ ކެނދިކުޅުދޫ ދާއިރާގެ މެމްބަރު އަޙްމަދު ޢީސާ ވިދާޅުވީ، ފުށިދިއްގަރު ފަޅުހިއްކުމަށް އެމަަސައްކަތް ހަވާލުކޮށްފައިވާ ފަރާތަށް ފަސޭހަކޮށްދިނުމުގެ ގޮތުން، ހިމާޔަތްކޮށްފައި ސަރަހައްދުތަކުން ވެލި ނެގޭ ގޮތަށް ޤަވާއިދު އިސްލާޙް ކުރުމަކީ ކަންބޮޑުވެވަޑައިގަންނަވާ ކަމެއް ކަމަށެވެ. އަދި އެކަމާއި ދެކޮޅަށް ހުރިހާ ފަރާތްތަކުންވެސް މަސައްކަތް ކުރަންޖެހޭ ކަމުގައި އީސަ ވިދާޅުވިއެވެ.

އަޙްމަދު އީސާ ވަނީ، ސަރުކާރުން މިފަދަ ކަންކަން ކުރިޔަ ނުދިނުމަށް މަސައްކަތް ކޮށްދިނުމަށްވެސް ރައްޔިތުންނާއި މީޑިއާތަކުގެ ކިބައިން އެދިވަޑައިގެންފައެވެ.

ޤަވާއިދުގައި ކުރިން ބަޔާންކޮށްފައި އޮންނަ ގޮތުން، ހިމާޔަތްކޮށްފައިވާ ސަރަހައްދަކާއި، 200 މީޓަރު ކައިރިން ބިން ހިއްކުންފަދަ ކަންކަމަށް ވެލި ނެގުމަކީ މަނާކަމެކެވެ.

ޤަވާއިދަށް މިބަދަލު ގެނައިރު، މިސަރުކާރުން ފެށި އެންމެ ބޮޑު މަޝްރޫޢު ކަމުގައިވާ ރަސްމާލެ މަޝްރޫޢު މިވަގުތު ކުރިޔަށް ނުގެންދެވި ހުއްޓިގައި އޮތީ އެތަން ހިއްކުމަށް ބޭނުންވާ ވެލި ކައިރި ހިސާބަކުން ލިބެން ނެތިގެންނެވެ.

ގަވާއިދު ނަންބަރު 15-އާރ/2013، ދިވެހިރާއްޖޭގެ ރަށްރަށާއި ފަޅުގެ ސަރަހައްދު ހިއްކުމާއި ފުންކުރުމުގެ ގަވާއިދަށް 2 ވަނަ އިޞްލާޙުގެނެސް އެޤަވާއިދު ގެޒެޓްކޮށްފައި ވަނީ އާދިއްތަ ދުވަހުގައެވެ.