ރައީސް ޔާމީން އިސްވެ ހުންނަވައި އުފައްދަވާ ޕާޓީ، ޕީއެންއެފް އުފެއްދުމުގެ ޖަލްސާ މާދަމާ ރޭ ބޭއްވުމަށް ނިންމައިފިއެވެ.

ޕީއެންއެފް އުފެއްދުމުގެ ޖަލްސާ ކުރިން ބޭއްވުމަށް މަސައްކަތް ކުރީ މިރޭގައެވެ. އެހެން ނަމަވެސް އެކަމުގައި ކަމާއި ބެހޭ ފަރާތްތަކުގެ އެއްބާރުލުން ނުލިބިގެން އެޖަލްސާ ބޭއްވޭ ގޮތް ނުވީ ކަމުގައިވެސް ޕީއެންއެފްއިން ވަނީ ބުނެފައެވެ.

ޕީއެންްއެފް އުފެއްދުމަށް ބާއްވާ ޖަލްސާ އޮންނާނީ މިއޭޕްރީލް މަހުގެ 9 ވަނަ ދުވަހުގެ ރޭ (މާދަމާރޭ) 9:15ގައި ޣިޔާޘުއްދީން ސްކޫލް ހޯލުގައެވެ. މިޖަލްސާގައި ރައީސް ޔާމީން ބައިވެރިވެ ވަޑައިގަންނަވާނެ ކަމުގައި އެ ޕާޓީ އުފެއްދުމުގެ މަސައްކަތުގައި އިސްކޮށް މަސައްކަތް ކުރައްވަމުން ގެންދަވާ، މުޙައްމަދު މަލީހް ޖަމާލު ވިދާޅުވިއެވެ.

މައުލޫމާތު ލިބިފައިވާ ގޮތުގައި އެ ޖަލްސާގައި ބައިވެރިވެވަޑައިގެންނެވުމަށް ރައީސް ޔާމީން މޯލްޑިވްސް ކަރެކްޝަނަލް ސަރވިސްގެ ހުއްދައަށް އެދިވަޑައިގެންފައި ވީނަމަވެސް އެކަމުގައި ކަރެކްޝަންސްއިން ނިންމި ގޮތެއް އެއިދާރާއިން ހާމަކޮށްފައެއް ނުވެއެވެ.

އެމްއެމްޕީއާރްސީގެ ޚިޔާނާތާއި ގުޅޭ މައްސަލަތަކެއްގައި، ރައީސް ޔާމީނުގެ މައްޗަށް 11 އަހަރުގެ ޖަލުހުކުމެއް އިއްވާފައިވާއިރު، އެމަނިކުފާނު ޖަލު ބަންދުން ގޭބަންދަށް ބަަދަލުކޮށްފައި ވަނީ ރައީސް އިބްރާހީމް މުހައްމަދު ޞާލިހްގެ ވެރިކަމުގެ އެންމެ ފަހު ދުވަސްތަކުގައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވީ، ރައީސް ޔާމީނު މިނިވަންކޮށްދެއްވާނެ ކަމުގެ ވަޢުދާއި އެކުގައި ނަމަވެސް ވެރިކަމުގެ 4 މަސް ނިމިގެން ދިޔައިރު ރައީސް ޔާމީނަށް އެއްވެސް ލުޔެއް ލިބިވަޑައިގެންފައެއް ނުވެއެވެ.

މާދަމާ ރޭގެ ޖަލްސާގައި ރައީސް ޔާމީނު ބައިވެރިވެވަޑައިގަންނަވާނެ ކަން އިޢުލާނުކޮށްފައި ވާއިރު އެމަނިކުފާނަށް ކަރެކްޝަންސް އިން އޮތީ ސިޔާސީ ހަރަކާތްތަކުގައި ބައިވެރިވުން މަނާކޮށްފައެވެ. އެހެން ނަމަވެސް މިހާތަނަށްވެސް ރައީސް ޔާމީން ގެންދަވަނީ ޕީއެންއެފްގެ އޮފީހުގައި ކެމްޕޭނާއި ގުޅޭ ހަރަކާތްތަކާއ ބައްދަލުވުންތަކުގައި ބައިވެރިވެވަޑައިގަންނަަވަމުންނެވެ.