އަޅުގަނޑުމެން ކުރާ ހެޔޮ ޢަމަލުތަކަށް ރައްކާތެރިވުމަކީ، އަޅުގަނޑުމެން ސަމާލުކަންދޭންޖެހޭ މުހިންމު ކަމެއް. 

އެހެންކަމުން ރޯދައާ ހެޔޮ އަމަލުގެ ބާވީސްވަނަ އެޕިސޯޑުގައި ޝެއިޙް އިލްޔާސް ޖަމާލް ވާހަކަފުޅު ދެއްކެވީ ﷲ ތަޢާލާގެ މައްޗަށް ތައައްލީ ކުރުމުގެ ނުބައިކަމާ ގުޅޭގޮތުން.

ޤުދްސީ ޙަދީޘެއްގައި ﷲ ތަޢާލާ ވަޙީކުރައްވަނީ:

«من ذا الذي يتألى عليّ أن لا أغفر لفلان فإني قد غفرت لفلان وأحبطت عملك » رواه مسلم  

މާނައީ: " މިވެނި މީހަކަށް ތިމަން އިލާހު ނުފުއްސަވާނެކަމަށް ބުނެ ތިމަން އިލާހުގެ މައްޗަށް ތައައްލީކުރަނީ ކާކު ހެއްޔެވެ؟ ފަހެ ހަމަކަށަވަރުން ތިމަން އިލާހު މިވެނި މީހަކަށް ފުއްސަވައިފީމެވެ. އަދި ތިބާގެ ޢަމަލު ބާޠިލްކުރައްވައިފީމެވެ."

ލޮބުވެތި މުސްލިމު އަޚުންނާ އުޚްތުން! މީސްމީހުންނަށް ޙުކުމް ނުޖައްސަވާ! ﷲ ގަންދީ ހުވާކޮށް މިވެނި މީހަކު ދުވަހަކު ވެސް އިޞްލާޙެއް ނުވާނެއޭ، އޭނާ ދާނީ ނަރަކައަށޭ، އޭނާއަށް ﷲ ނުފުއްސަވާނެއޭ، މިފަދަ ބަސްތަކުން މީހުންނަށް ޙުކުމްކޮށް ﷲ ގެ މައްޗަށް ތައައްލީ ނުކުރައްވާ! ތައައްލީ ކުރުމަކީ ތިބާގެ ހެޔޮ ޢަމަލުތައް ބާޠިލްވެދާނެކަމެއް. ވީމާ މިކަމާމެދު ސަމާލުވެލައްވާ!