ވައިގެ މަގުން ރާއްޖެއަށް މަސްތުވާތަކެތި އެތެރެކުރުމުގައި އެއާޕޯޓުގެ މުވައްޒަފުންތަކެއް ބައިވެރިވެފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ ތަރުޖަމާނު އަޙްމަދު ޝިފާން ވިދާޅުވީ، މިމާރިޗުމަހުގެ 15 ވަނަ ދުވަހު، މަސްތުވާތަކެތި ހުރި ލަގެޖެއް އުސޫލުން ބޭރުން އެއާޕޯޓުން ބޭރުކުރަން އުޅުނު މައްސަލައެއްގައި އެއާޕޯޓުގެ ދެ މުވައްޒަފަކާއި، ލަގެޖާއި ހަވާލުވާން އައި ދިވެހި މީހާ އާއި އަދި އެލަގެޖު ގެނައި ޕާކިސްތާނުގެ މީހަކު ހައްޔަރުކޮށްފައި ވާކަަމަށެވެ.

ފުލުހުންގެ ތަރުޖަމާނު ވިދާޅުވީ، އުސޫލާއި ޚިލާފަށް އެއާޕޯޓުން ބޭރުކުރަން އުޅެނިކޮށް އަތުލައިގަތް ލަގެޖުގައި، 4.5 ކިލޯއަށްވުރެ މަސްތުވާތަކެތި ހުރިކަމަށެވެ. އެމަސްތުވާތަކެތީގެ ތެރޭގައި ހިމެނެނީ، މެތާއި ހެރޮއިން ކަމަށްވެސް ޝިފާން ވިދާޅުވިއެވެ.

Advertisement

އެމީހުންގެ ބަންދިގެ މުއްދަތު އިތުރުކުރުމަށް މިއަދު އެމީހުން ކޯޓަށް ހާޟިރު ކުރުމުން، އެމީހުންގެ ތެރޭގައި ހިމެނޭ އެއާޕޯޓުގެ ސީނިއަރ މުވައްޒަފު ފުލުހުން ދޫކޮށްލާފައިވާ ކަމުގައިވެސް ޝިފާން ވިދާޅުވިއެވެ. ޝިފާން ވިދާޅުވީ، އެމުވައްޒަފާއި ދެކޮޅަށް ހެކި ހުރި ނަމަވެސް އޭނާ ބަންދުން ދޫކޮށްލާފައި ވަނީ ޝަރުތުތަކާއި އެކުގައި ކަމަށެވެ.

އަދި މިމައްސަލައިގައި ގިނަ މުވައްޒަފުންތަކެއް ހިމެނޭތީ، އެކަން ވަރަށް ސީރިއަސް މައްސަލައެއްގެ ގޮތުގައި ބަލައި ތަޙްޤިޤުކުރަމުންދާކަމުގައިވެސް ފުލުހުންގެ އިދާރާއިން ވަނީ ވިދާޅުވެފައެވެ.