އިންޑިއާއިން ރާއްޖެއަށް އެތެރެކުރާ އަސާސީ ކާބޯތަކެތީގެ ކޯޓާ އިންޑިއާއިން އިތުރުކޮށް މުއްދަތު އިތުރުކޮށްދީފިއެވެ.

މިސަރުކާރުން އިންޑިއާ އާއި މެދު ނަފްރަތު އުފެއްދުމާއި އިންޑިއާ އާއި ދެކޮޅު ހަރަކާތްތައް ހިންގަމުން ދިޔަ ނަމަވެސް، ޒަމާނުއްސުރެ ދެ ޤައުމުގެ ދެމެދުގައި ޤާއިމް ކުރެވިފައިވާ އެއްބަސްވުންތަކުގެ ދަށުން، ރާއްޖެއިން ވަނީ، އަސާސީ ކާބޯތަކެތި ރާއްޖެއަށް އިމްޕޯޓު ކުރުމުގެ ކޯޓާ އާއި މުއްދަތު އިތުރުކޮށްދިނުމަށް އެދިފައެވެ.

އިންޑިއާ އެމްބަސީން ނެރެފައިވާ ބަޔާނުގައި ވަނީ، އަސާސީ ކާބޯތަކެއްޗާއި ހިލަޔާއި ހިލަވެލި، މިއަހަރާއި އަންނަ އަހަރުވެސް އިންޑިއާއިން ދިވެހިރާއްޖެއަށް އިމްޕޯޓް ކުރުމުގެ ހުއްދަ ދީފައިވާ ކަމަށެވެ. އަދި ކުރީ އަހަރުތަކަށްވުރެ މިއަހަރު އެބާވަތްތަކުން ކޯޓާވެސް ވަނީ އިތުރުކޮށްދީފައެވެ.

Advertisement

މި ގޮތުން، ފިޔާ، ހަނޑޫ، ހަކުރު، ފުށް، އަލުވި، ބިސް، މުގު އަދި ހިލަ އާއި ހިލަވެލި ރާއްޖެ އެތެރެކުރުމަށް ވަނީ ކޯޓާ އިތުރުކޮށްދީފައެވެ. މީގެ އިތުރުން އިންޑިއާއިން މިބާވަތްތައް ދިވެހިރާއްޖެއަށް ވިއްކަނީ، އާއްމު އެކްސްޕޯޓް ރޭޓަސް ވުރެ ހެޔޮ އަގެއްގައެވެ.

ކުރިޔަށް އޮތް ދެއަހަރު ރާއްޖެއަށް އިމްޕޯޓްކުރުމަށް އިންޑިއާއިން ދީފައިވާ ކޯޓާ؛

428 މިލިއަން ބިސް

21000 މެޓްރިކްޓަނުގެ އަލުވި

36000 މެޓްރިކްޓަނުގެ ފިޔާ

124000 މެޓްރިކްޓަނުގެ ހަނޑޫ

109000 މެޓްރިކް ޓަނުގެ ގޮދަން ފުށް

64000 މެޓްރިކްޓަނުގެ ހަކުރު

224 މެޓްރިކްޓަނުގެ މުގު

ދެމިލިއަން މެޓްރިކްޓަނުގެ ހިލަޔާއި ހިލަވެލި

ދިވެހިރާއްޖެއަށް އިންޑިއާއިން އަސާސީ ކާބޯތަކެތި އިމްޕޯޓްކުރުމަށް ދީފައިވާ ކޯޓާ އާއި މުއްދަތު އިތުރުކޮށްދިނުމާއި ގުޅިގެން ސަރުކާރުގެ އިސްވެރިންނާއި ސަރުކާރަށް ތާއީދު ކުރާ ފަރާތްތަކުން ގެންދަނީ އިންޑިއާއަށް ޝުކުރު އަދާކުރަމުންނެވެ. މިސަރުކާރު ވެރިކަމަށް އައިސްފައި ވަނީ އިންޑިއާ އާއި މެދު ދިވެހިންގެ ހިތްތަކުގައި ނަފްރަތު އުފެއްދުމަށް ކުރިޔަށް ގެންދިޔަ އިންޑިއާ ބޮއިކޮޓް ކުރުމުގެ ކެމްޕޭންތަކުގެ ތެރެއިން ކަމަށް ވާއިރު، މިސަރުކާރުގެ ސިޔާސީ މަޤާމުތަކުގައި ތިއްބެވި ބައެއް ބޭފުޅުން އިންޑިއާއަށް ބަދު ބަސް ބުނުމާއި ގުޅިގެން ދެޤައުމުގެ ގުޅުން ގޯސްވެގެން ދިޔައެވެ.