އއ. ރަސްދޫގައި ކުޑަ ފިރިހެން ކުއްޖަކަށް ބަޔަކު އަނިޔާކުރި މަންޒަރު ފެންނަ ވީޑިއޯއެއް ސޯޝަލް މީޑިއާގައި އާއްމުވުމާއި އެކު އެމައްސަލަ ފުލުހުން ބަލަން ފަށައިފިއެވެ.

މިސްކިތެއްގެ ފާޚާނާ ތެރޭގައި ކުޑަ ފިރިހެން ކުއްޖަކަށް ޖިސްމާނީ އަނިޔާކޮށް ބުލީ ކުރާ މަންޒަރު ފެންނަ ވީޑިއޯ ދައުރުވާން ފެށުމާއި އެކު، ހޯމް މިނިސްޓަރ ޢަލީ އިޙްސާން ވިދާޅުވީ، ކުޑަކުއްޖަކަށް އަނިޔާކުރާ މަންޒަރު ފެންނަ ވީޑިއޯއެއް ވަނީ ފުލުހުންގެ ސަމާލުކަމަށް އައިސްފައިކަމަށެވެ. އަދި އެކަން ކުރިފަރާތްތައް ހޯދައި އަވަހަށް ފިޔަވަޅުއެޅުމަށް ފުލުހުން ދަނީ މަސައްކަތްކުރަމުންކަމަށާއި، އެ ފަދަކަންކަން މުޖުތަމައުގައި ހިންގާފަރާތްތަކާއިމެދު އެޅެންއޮތް އެއްމެ ހަރުކަށި ފިޔަވަޅު އަޅާނެ ކަމުގެ ޔަޤީންކަން ދޭ ކަމުގައިވެސް ހޯމް މިނިސްޓަރ ވިދާޅުވިއެވެ.

މިކަމާއި ގުޅޭ ގޮތުން ކޮމިޝަނަރ އޮފް ޕޮލިސް، ޢަލި ޝުޖާއު ވިދާޅުވީ، މިހާތަނަށް ލިބިފައިވާ މަޢުލޫމާތުން ކުޑަކުއްޖާއަށް އަނިޔާކޮށްފައިވާކަން ޔަޤީން ކުރެވެނީ އއ.ރަސްދޫ ގައި ކަމަށެވެ. އަދި ފުލުހުންދަނީ މިމައްސަލަ ވަރަށް ސީރިއަސް މައްސަލައެއްގޮތުގައި، ބަލައި ތަޙްޤީޤު ކުރަމުން ކަމުގައިވެސް ސީޕީ ވިދާޅުވިއެވެ.

Advertisement