އިޒްރޭލުން ސޫރިޔާގައި ހުންނަ އީރާނުގެ ކޮންސިއުލޭޓަށް ދިން ހަމަލާގެ ބަދަލު ހިފުމުގެ ގޮތުން އީރާނުން ދީފާނެ ހަމަލާއެއްގެ ބިރަށް ފަސް ޤައުމެއްގައި ހުރި އިޒްރޭލުގެ އެމްބަސީތައް ހުސްކޮށް ބަންދުކޮށްފިއެވެ.

މީޑިއާތަކުން ރިޕޯޓުކޮށްފައިވާ ގޮތުގައި، މިސްރާއި ބަޙްރައިން އަދި އުރުދުން އާއި މަޣުރިބު އަދި ތުރުކިޔޭގައި ހުންނަ އިޒްރާއީލުގެ އެމްބަސީތައް ހުސްކޮށް މިހާރު ވަނީ އެތަންތަން ބަންދުކޮށްފައެވެ. އެމެރިކާގެ ސީއައިއޭއިން ވަނީ އީރާނުން ބެލެސްޓިކް މިސައިލުންނާއި ފިދާޢީ ޑްރޯންތައް ބޭނުންކޮށްގެން އިޒްރޭލުގެ އަމާޒުތަކަށް ހަމަލާދޭނެ ކަމުގެ އިންޒާރު ދީފައެވެ. އަދި މިއިންޒާރާއި ގުޅިގެން އިޒްރޭލުން ފިޔަވަޅުތައް އަޅަމުން އަންނައިރު، ތެލްއަވީވަށް ކުރިމަތިވެދާނެ ހަމަލާއަކަށް ތައްޔާރުވުމުގެ ގޮތުން، ހޮސްޕިޓަލްތައްވެސް ވަނީ އެލާޓަށް ގެނެސްފައެެވެ. އަދި އިޒްރޭލުގެ ސިފައިންނަށް ޗުއްޓީދިނުންވެސް މެދުކަނޑާލައި 77000 ސިފައިން ހަނގުރާމައަށް ނެރުމަށް އިޒްރޭލުން އަންނަނީ ތައްޔާރުވަމުންނެވެ.

ސޫރިޔާގައި ވެރިރަށް ދިމިޝްޤުގައި ހުރި އީރާނުގެ ކޮންސިއުލޭޓަށް އިޒްރޭލުން ދިން ހަމަލާތަކުގެ ބަދަލު ހިފާނެ ކަމަށް އީރާނުން ވަނީ ވަޢުދުވެފައެވެ. އީރާނުގެ ބޯޑަރު ހުރަސްކޮށް ޢިރާޤުގެ ތެރެއަށް އީރާނުގެ އަސްކަރިއްޔާގެ ފައުޖުތައް މިހާރު ވަނީ ބަރު ހަތިޔާރާއި އެކު ވަދެފައެވެ.

Advertisement