ދިވެހިރާއްޖެއަށް ޕޯސްޓްގެ ޒަރީއާއިން ޕާޓީ ޑްރަގްސް އާއި މަސްތުވާތަކެތީގެ ބާވަތްތައް އެތެރެކުރުމުގެ މަސައްލަތައް ވަރަށް ބޮޑަށް އިތުރުވެފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

މިހެން ވިދާޅުވީ، ފުލުހުންގެ ތަޙްޤީޤުތަކާއި ގުޅޭ ގޮތުން މީޑިއާއަށް މައުލޫމާތު ޙިއްޞާކުުރުމަށް މިއަދު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި، ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝާކިރުއެވެ.

އޭނާ ވިދާޅުވީ، ޕޯސްޓުން މަސްތުވާތަކެތި ގެނައުމަކީ ނުރައްކާތެރި ކަމެއް ކަމަށާއި އޭގެ ސަބަބަކީ، އެހެން މީހުންގެ ނަންމަތީގައިވެސް ޕޯސްޓް މެދުވެރިކޮށް އެފަދަ ތަކެތި ގެނައުމުގެ ފުރުޞަތު އޮތުން ކަމަށެވެ.

މީގެ އިތުރުންވެސް، ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝާކިރު ވިދާޅުވީ ރާއްޖެއަށް ވައިގެ މަގުން ގިނައަދަދަކަށް މަސްތުވާތަކެތި އެތެރެވަމުން އަންނަ ކަމަށެވެ. މިގޮތުން މިދިޔަ ތިން ދުވަހުގެ ތެރޭގައިވެސް 17 ކިލޯގެ މަސްތުވާތަކެތި ވަނީ އަތުލައިގަނެވިފައި ކަމުގައި އޭނާ ވިދާޅުވިއެވެ. އަދި އެމަސްތުވާތަކެއްޗަކީ ފުލުހުން ހިންގި ފަސް އޮޕަރޭޝަނެއްގައި އަތުލައިގަނެވުނު މަސްތުވާތަކެތިކަމުގައިވެސް ޝާކިރު ވިދާޅުވިއެވެ.