ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވުމަށް ވެވަޑައިގެންނެވި ވަޢުދުތަކަކީ ބޮޑު ދޮގުތަކެއް ކަމަށް ރައްޔިތުން މިހާރު ޤަބޫލު ކުރާ ކަމުގައި ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިސްރާބު ހަމަމަގަށް ކެމްޕޭން ހަރަކާތުގައި އައްޑޫ ސިޓީއަށް ވާދަކުރައްވާ ކެންޑިޑޭޓުންނާއި އެކު މިރޭ ލޮނު ޒިޔާރަތްކޮޅު ރާޅުގަނޑު ސަރަހައްދުގައި ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.

ރައީސް ޞާލިހް ވިދާޅުވީ، ރައީސް ޑރ. މުޙައްމަދު މުޢިއްޒުގެ ވަޢުދުތަކަކީ ދޮގުތަކެއް ކަމާއި މެދު ޝައްކުކުރާ އެއްވެސް މީހަކު މިހާރު ރާއްޖޭގައި ނޫޅޭ ކަމަށެވެ. އަދި އަނެއްކާވެސް އެމްޑީޕީން ކަންބޮޑުވަނީ، ކުރިޔަށް މިއޮތް ރައްޔިތުންގެ މަޖިލީހުގެ އިންތިޚާބު ކާމިޔާބުކުުރުމަށް، ދޮގުމައްޗަށް އަނެއްކާވެސް ދޮގު ހަދައި އޮޅުވާލަމުން ގެންދާތީ ކަމުގައިވެސް ރައީސް ޞާލިޙް ވިދާޅުވިއެވެ. އަދި އެކަމަކީ ހުއްޓުވަން ޖެހޭ ކަމެއް ކަމުގައިވެސް އެމަނިކުފާނު ވިދާޅުވިއެވެ.

ރައީސް ޞާލިހް ވިދާޅުވީ، އިންފޮމޭޝަން ކޮމިޝަނަރު ބޭއްވެވި އަޑުއެހުމަށް ރައީސް އޮފީހުން މީހަކު ދާން ބުނީމާ، ބިޒީކަމުންނޭ ވިދާޅުވެ ބައިވެރި ނުވިކަމަށެވެ. އަދި އެއަދަދު ހާމަކުރަން ކެރިވަޑައި ނުގަންނަވާނޭ ކަމަށް ޔަޤީން ކުރެވޭ ކަމުގައިވެސް ރައީސް ޞާލިޙް ވިދާޅުވިއެވެ.

އެމަނިކުފާނު ވިދާޅުވީ، މިސަރުކާރުގެ ސިޔާސީ މަޤާމުތަކުގައި ތިއްބެވި މީހުންގެ އަދަދު 1500އަށްވުރެ މައްޗަށް އަރައިގެން ގޮސްފައިވާ ކަމަށެވެ. އެކަމާއި ގުޅޭ ގޮތުން ރައީސް، ޑރ. މުހައްމަދު މުޢިއްޒު ކުރިން ދެއްކެވި ވާހަކަފުޅުތަކަށް އަލިއަޅުއްވާލައްވައި ރައީސް ޞާލިޙް ވިދާޅުވީ، ރައްޔިތުންގެ މަޖިލީހުގެ ޖަލްސާގައި، ކޮންމެހެން ބޭނުމެއް ޖެހިގެން ނޫނިއްޔާ ވަޒީފާއަށް އިތުރު މީހަކު ނުނަގާނެކަމަށް ވިދާޅުވެފައި ވާކަމަށެވެ. އެހެން ނަމަވެސް ސަރުކާރު އެމައުލޫމާތު ހާމަ ނުކުރުމުގެ ކަންބޮޑުުވުން ފާޅު ކުރައްވައި ރައީސް ޞާލިހް ވިދާޅުވީ، އެޚަރަދުކުރާ ފައިސާ އަކީ ރައްޔިތުންގެ ފައިސާ ކަމަށެވެ. އަދި ރައްޔިތުންގެ މަޖިލީހުގެ އިންތިޚާބު ނުނިމެނީސް އެއިން އެއްވެސް ކަމެއް ހާމަ ނުކުރާނޭ ކަން ޔަޤީންވެވަޑައިގަންނަވާ ކަމުގައިވެސް ރައީސް ޞާލިޙް ވިދާޅުވިއެވެ.

ރައްޔިތުންގެ މަޖިލީހުގެ އިންތިޚާބަށް ނުފޫޒު ފޯރުވުމުގެ ގޮތުން ސަރުކާރުން އަމަލުތައް ކުރަމުން އަންނަކަމާއި، ސަރުކާރު ހިންގާ ޕާޓީގެ ކެމްޕޭނަށް ދައުލަތުގެ މުދަލާއި ވަޞީލަތްތައް ނުހަމަ ގޮތުގައި ބޭނުން ކުރަމުންދާ ކަމުގެ ތުހުމަތުވެސް މިސަރުކާރަށް ވަނީ ކުރިމަތިވެފައެވެ.