އައްޑޫ ސިޓީގެ ތަރައްޤީއަށް ކުރެވުނު މަސައްކަތެއް ކުރެވިފައި އޮތީ އެމްޑީޕީގެ ވެރިކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިސްރާބު ހަމަމަގަށް ކެމްޕޭން ހަރަކާތުގައި އައްޑޫ ސިޓީއަށް ވާދަކުރައްވާ ކެންޑިޑޭޓުންނާއި އެކު މިރޭ ލޮނު ޒިޔާރަތްކޮޅު ރާޅުގަނޑު ސަރަހައްދުގައި ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.

ރައީސް ޞާލިޙްގެ ވާހަކަފުޅުގައި، ރާއްޖެއަށް އިސްލާޙީ ބަދަލުތައް ގެނައުމުގައި އައްޑޫ ސިޓީގެ ރައްޔިތުން ކޮށްފައިވާ މަސައްކަތްތައް ފާހަގަކުރައްވައި، 2008 ވަނަ އަހަރު އެމްޑީޕީގެ ސަރުކާރެއް އުފެދިގެން ދިޔުމުގައި އައްޑޫގެ ރައްޔިތުން އަދާކުރި މުހިއްމު ދައުރުގެ މައްޗަށްވެސް އަލި އަޅުއްވާލެއްވިއެވެ.

ރައީސް ޞާލިޙް ވިދާޅުވީ، އެމްޑީޕީގެ ފުރަތަމަ ވެރިކަން ނިމިގެން ދިޔުމަށްފަހުގައި ދެން އައި 8 އަހަރަކީ އައްޑޫ ސިޓީ ވީރާނާކޮށްލި އަދި އައްޑޫ ސިޓީގެ ރައްޔިތުންނަށް ހިތްދަތިކަން ގެނުވި އަހަރުތަކެއް ކަމަށެވެ. އަދި އައްޑޫ ސިޓީގެ ތަރައްޤީއަށް ކުރިނަމަ ކުރި މަސައްކަތެއް ކޮށްފައިވަނީ އެމްޑީޕީގެ ސަރުކާރުތަކުގައި ކަމަށާއި، ޚާއްޞަކޮށް މިދިޔަ ފަސްއަހަރު އައްޑޫ ސިޓީގެ ތަރައްޤީއަށް ކުރެވިފައިވާ މަސައްކަތްތައް ހަނދާން ހުންނާނެ ކަމަށެވެ.

މިގޮތުން އައްޑޫ ސިޓީގެ މަގުތައް ހެދުމާއި އެއާޕޯޓު ތަރައްޤީ ކުރުމާއި، ބިންހިއްކުމާއި އެނޫންވެސް އުމުރާނީ ތަރައްޤީއަށް ކުރެވިފައި ހުރި ގިނަ މަސައްކަތްތައް ރައީސް ޞާލިޙް ވަނީ ފާހަގަކުރައްވާފައެވެ. އެމަނިކުފާނު ވިދާޅުވީ، އައްޑޫ ސިޓީގެ ތަރައްޤީއަށް ކުރީ ސަރުކާރުގައި ކުރަން ފަށާފައި ހުރި މަސައްކަތްތައް ބަލާލުމުން، އެމްޑީޕީ ސަރުކާރުންް އައްޑޫ ސިޓީއަށް ބަދަލުތަކެއް ގެނައުމަށް މަސައްކަތް ކުރިކަން ފެނިގެންދާނެ ކަމަށެވެ.

ރައީސް ޞާލިޙް ވިދާޅުވީ، އައްޑޫ ސިޓީގެ ރައްޔިތުންނަށް އެންމެ މުހިއްމު ކަމަކީ ވަޒީފާ ކަމަށެވެ. އެގޮތުން ވަޒީފާތައް އިތުރުކުރުމަށްޓަކައި، ކުރެވެން އޮތް އެންމެ މުހިއްމު ކަމަކީ ޓުއަރިޒްމް އިންޑަސްޓްރީ ކުރިއެރުވުން ކަމަށާއި އެއީ އައްޑޫ ސިޓީއަށް ގެންނަން ބޭނުންވި ބަދަލުކަމުގައި ރައީސް ޞާލިޙް ވިދާޅުވިއެވެ. 

ރައީސް ޞާލިޙް ވިދާޅުވީ، ކުރިޔަށް އޮތް ރައްޔިތުންގެ މަޖިލީހުގައިވެސް ކުރިއެކޭ އެއްގޮތަށް އައްޑޫ ސިޓީގެ ތާއީދާއި އެކުގައި، ރައްޔިތުންގެ މަޖިލީހުގެ އަޣުލަބިއްޔަތު އެމްޑީޕީން މިފަހަރުވެސް ނަގާނެ ކަމަށެވެ.