މިސަރުކާރާއި ގުޅޭ ގޮތުން އިދިކޮޅު ފަރާތްތަކުން ފަތުރަނީ ދޮގުވާހަކަތައް ކަމަށާއި އެފަދަ ވާހަކަތައް ދައްކަނީ، މިސަރުކާރުން ކުރާ ކަންކަމަށް އިދިކޮޅު ފަރާތްތަކަށް ދެވޭނެ ޖަވާބެއް ނެތިގެން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސް ޑރ. މުހައްމަދު މުއިއްޒު މިހެން ވިދާޅުވީ، ރައީސުލްޖުމްހޫރިއްޔާގެ އޮފީހުން ސޯޝަލްމީޑިއާގައި ގެނެސްދޭ ރައީސްގެ ޖަވާބު ސިލްސިލާގައި އާއްމު މީހަކު ކުރެއްވި ސުވާލަށް ދެއްވި ޖަވާބުގައެވެ. ހުޅުމާލެ ލޮޓް ނަންބަރު 10471، ޙުސައިން ރަޝީދު ސުވާލުކުރައްވާފައި ވަނީ ރައީސް ކަންކަމުގައި އިތުރުފުޅު ހައްދަވާކަމަށް އިދިކޮޅުން ކުރާ ތުހުމަތުތަކާއި ގުޅޭ ގޮތުންނެވެ.

ރައީސް ޑރ. މުހައްމަދު މުޢިއްޒު ވިދާޅުވީ، އެމަނިކުފާނު ދެއްކެވި ވާހަކައެއް ވިއްޔާ އޮންނާނީ ފެންނަން ކަމަށާއި، އަދި އެމަނިކުފާނު ސުވާލަކަށް ދެއްވާ ޖަވާބެއް ނަމަވެސް ލިޔުމުން ރެކޯޑް ކުރަމުންދާ ކަމަަށެވެ. އަދި އެވެސް ފޮތެއްގެ ގޮތުގައި ތައްޔާރުކުރަމުން އެބަދާކަމުގައި ރައީސް ވިދާޅުވިއެެވެ.

ރައީސް ޑރ. މުހައްމަދު މުޢިއްޒު ވިދާޅުވީ، އެމަނިކުފާނު އެއްވެސް ކަމެއް ނުފޮރުއްވަވާނެ ކަމަށާއި، އެމަނިކުފާނު ދައްކަވާ ވާހަކަފުޅެއް ދައްކަވަނީ އިޚްލާޞްތެރިކަމާއި އެކީގައި ހިތުގެ އަޑިން ކަމަށެވެ.