ގޮވާމުން ފިތުރު ޒަކާތް ބަލައިގަތުން ނިންމާލުމަށް ކުރިން ހަމަޖައްސާފައިވާ ގަޑި، އަވަސްކޮށްފައިވާ ކަމުގައި މޯލްޑިވްސް ޒަކާތު ހައުސްއިން ހާމަކޮށްފިއެެވެ.

އެއިދާރާއިން ނެރެފައިވާ ބަޔާނުގައި ބުނެފައި ވަނީ، މި އޭޕްރީމަހުގެ 9ވާ އަންގާރަ ދުވަހަކީ، މިރަމަޟާން މަހުގެ އެންމެ ފަހު ދުވަސް ކަމުގައި އިސްލާމީކަންތައްތަކާއި ބެހޭ ވުޒާރާއިން ނިންމަވައިފިނަމަ، އެދުވަހު ގޮވާމުން ފިތރު ޒަކާތް ބަލައިގަންނާނެ އެންމެ ފަހު ވަގުތަކީ އެދުވަހުގެ 15:30 ކަމަށެވެ.

ގޮވާމުން ފިތުރު ޒަކާތް ބަލައިގަންނަމުން ގެންދަނީ އަމިނިއްޔާ ސްކޫލުގެ ހޯލުންނެވެ.

މޯލްޑިވިސް ޒަކާތު ހައުސްއިން ކުރިން ހަމަޖައްސާފައި އޮތީ އެދުވަހުގެ 18 ގަޑި ސުންމިނެޓާއި ހަމައަށް ފިތުރު ޒަކާތް ބަލައިގަތުމަށެވެ. ގޮވާމުން ފިތުރުޒަކާތް ބަލލައިގަތުން ހުއްޓާލާ ގަޑިއަށް ބަދަލު ގެނައި ނަމަވެސް ފައިސާއިން ފިތުރުޒަކާތް ބަލައިގަންނަ އެންމެ ފަހު ވަގުތަކަށް ބަދަލެއް ގެނެސްފައެއް ނުވެއެވެ. ފައިސާއިން އެންމެފަހަށް ޒަކާތް ބަލައިގަންނާނީ، އެދުވަހުގެ 18:00 ގެ ނިޔަލަށެވެ.