އައްޑޫ ސިޓީ ގަމާއި، ގއ. ކޫއްޑޫ އާއި ދެމެދު ސީދާ ދަތުރުތައް ހަފްތާއަކު ދެފަހަރު ބޭއްވުމަށް މޯލްޑިވިއަނުން ނިންމައި އެކަން އިއުލާނުކޮށްފިއެވެ.

މޯލްޑިވިއަން އިން ބުނީ، މިދަތުރުތައް އޮންނާނީ ހަފްތާގެ އަންގާރަ އަދި ހޮނިހިރުގައި ކަމަށެެވެ. މިގޮތުން މިދަތުރުތަކުގައި ބޭނުން ކުރާނީ މޯލްޑވިއަންގެ ޑޭޝް-08 އަދި އޭޓީއާރް އެއަރކްރާފްޓްތައްކަންވެސް އެއެއާލައިނުން ވަނީ ހާމަކޮށްފައެވެ.

މޯލްޑިވިއަންއިން ބުނީ، ސައުތު ކަނެކްޓިވިޓީ އިނީޝިއެޓިވްގެ ތެރެއިން ފަށާ މިދަތުރުތަކަށް މިއަދުންފެށިގެން ޓިކެޓް ބުކް ކުރެވެން ހުންނާނެ ކަމަށެެވެ. މޯލްޑިިވިއަން އިން ބުނީ މިޚިދުމަތާއި އެކު ސްރީލަންކަން އެއާލައިންސްއިން ގަމަށް އަންނަ ފަތުރުވެރިންނަށް، ޑައިރެކްޓް ފްލައިޓްގައި ހުވަދު އަތޮޅުގެ ރިޒޯޓުތަކަށް ދިޔުމަށް މަގުފަހިވާނެ ކަަމަށެވެ. 

ހުވަދު އަތޮޅުގައި 2100 ޓޫރިސްޓް އެނދު ހުންނައިރު، ފަތުރުވެރިންނަށާއި ދިވެހިންނަށްވެސް ދަތުރުފަތުރު ކުރުމުގައި ދިމާވަމުން އަންނަ ބުރަތަކަށް މިކަމުން ލުޔެއް ލިބިގެންދާނެއެވެ.

ސައުތު ކަނެކްޓިވިޓީއަކީ، ދިވެހި ސަރުކާރުން އިސްނަގައިގެން ، ރާއްޖެގެ ދެކުނުގެ ސަރަހައްދުގެ ތަރައްޤީއަށް އެހީތެރިވެދިނުމަށްޓަކައި، މޯލްޑިވިއަން އާއި އައްޑޫ އިންޓަނެޝަނަލް އެއާޕޯޓާއި މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަން އަދި ޓޫރިޒަމް މިނިސްޓްރީގެ އިތުރުން އެމްއެމްޕީއާރްސީން ގުޅިގެން ފަތުރުވެރިކަން އިތުރަށް ގުޅުވައިދީ، ވިޔަފާރީގެ ގުޅުންތައް ފޯރުކޮށް ދިނުމަށް ހިންގާ ހަރަކާތެކެވެ.