ރަމަޟާން މަހުގެ 20 ވަނަ ދުވަހާއި ހަމައަށް ފިތުރު ޒަކާތުގެ ގޮތުގައި، 4.4 މިލިއަން ރުފިޔާ ލިބިފައިވާ ކަމުގައި މޯލްޑިވްސް ޒަކާތު ހައުސްއިން ހާމަކޮށްފިއެވެ.

ފިތުރު ޒަކާތާއި ބެހޭ ގޮތުން އާއްމުކުރި ތަފާސް ހިސާބުގައި ވާގޮތުން، ރޯދަމަހުގެ 20 ވަނަ ދުވަހުގެ ނިޔަލަށް ފިތުރު ޒަކާރުގެ ގޮތުގައި ވަނީ، 4،499،433ރ (ހަތަރުމިލިޔަން ހަތަރުލައްކަ ނުވަދިހަނުވަހާސް ހަތަރުސަތޭކަ ތެއްތިރީސް ރުފިޔާ) ދައްކާފައެވެ. މިގޮތުން އެންމެ ގިނަ މީހުން ފިތުރު ޒަކާތް ދައްކާފައި ވަނީ، ބޭންކް އޮފް މޯލްޑިވްސް މެދުވެރިކޮށެެވެ. ބީއެމްއެލް މެދުވެރިކޮށް އެކަނިވެސް ފިތުރު ޒަކާތުގެ ގޮތުގައި ޖުމުލަ، 2.2 މިލިއަން ރުފިޔާ ދައްކާފައިވެއެވެ. ދެވަނައަށް އެންމެ ގިނަ މީހުން ފިތުރު ޒަކާތްދައްކާފައި ވަނީ މޯލްޑިވްސް އިސްލާމިކް ބޭންކް މެދުވެރިކޮށެވެ. އެބޭންކު މެދުވެރިކޮށް ހަތްލައްކައަށް ވުރެ ގިނަ ރުފިޔާ ފިޠުރު ޒަކާތުގެ ގޮތުގައި ވަނީ ދައްކާފައެވެ.

ރަމަޟާންމަހުގެ ފުރަތަމަ 10 ދުވަސް ނިމުނު އިރު ފިޠުރު ޒަކާތުގެ ގޮތުގައި ދައްކާފައި ވަނީ، 1.5 މިލިއަން ރުފިޔާ ނަމަވެސް ދެވަނަ ދިހަ ދުވަސް ނިމުނުއިރު ވަނީ، ފިތުރު ޒަކާތުގެ ގޮތުގައި ލިބުނު ފައިސާގެ އަދަދު ތިން ގުނަ އިތުރުވެފައެވެ.

މޯލްޑިވްސް ޒަކާތު ހައުސްއިން ހާމަކުރައްވާފައިވާ ގޮތުގައި، ފައިސާއިން ޒަކާތް ބަލައިގަންނާނެ އެންމެ ފަހު ވަގުތަކީ، ރަމަޟާން މަހުގެ އެންމެ ފަހު ދުވަހުގެ 18:00އެވެ. އަދި ގޮވާމުގެ ބާވަތްތަކުންވެސް އެންމެ ފަހަށް ޒަކާތް ބަލައިގަންނާނީ، ރަމަޟާން މަހުގެ އެންމެ ފަހު ދުވަހުގެ 18:00 އާއި ހަަމައަށެވެ،