ފުވައްމުލަކުގައި ރޭވެސް ނުރައްކާތެރި އެކްސިޑެންޓެއް ހިނގައި ޒުވާނަކަށް އަނިޔާވެއްޖެއެވެ.

މިއެކްސިޑެންޓްގައި އަނިޔާވެފައި ވަނީ އުމުރުން 27 އަހަރުގެ ޒުވާނަކަށް ކަމަށާއި، އޭނާގެ ހާލު ސީރިއަސްވެ ފުވައްމުލަކު ހޮސްޕިޓަލްގައި ފަރުވާ ދިނުމަށްފަހު މިހާރު އިތުރު ފަރުވާއަށް މާލެ ގެނެސްފައިވާ ކަމުގައިވެސް ފުުލުހުންގެ އިދާރާއިން ވިދާޅުވިއެވެ.

ރޭ ގެ އެކްސިޑެންޓް ހިނގާފައި ވަނީ، ފުވައްމުލަކު ދިގުވާޑު ނައިބު ތުއްތުމަގުން ދުއްވާފައި ދިޔަ ސައިކަލެއް އެމަގުގައި ބާއްވާފައި އޮތް އެކްސްކަވޭޓަރެއްގައި ޖެހިގެންނެވެ. ފުލުހުންގެ އިދާރާއިން ވިދާޅުވީ، ހާދިސާ ފުލުހުންނަށް ރިޕޯޓްކޮށްފައި ވަނީ ރޭގެ 23:45 ގައި ކަމަށެވެ. އެކްސިޑެންޓް ހިނގާފައިވަނީ އެކްސްކަވޭޓަރެއްގައި ޖެހިގެން ކަމުގައި ފުލުހުން ވިދާޅުވި ނަމަވެސް، ފޮޓޯއިން ފެންނަ ގޮތުގައި، ސައިކަލްޖެހިފައިވަނީ، ލޯޑަރެއްގައެވެ. ބާރު ސްޕީޑުގައި އައިސް ސައިކަލުޖެހިފައިވަނީ އޭގެ ދަތްގަނޑު ތެރޭގައެވެ.

އިއްޔެރޭވެސް ފުވައްމުލަކުގައި ބާރު ސްޕީޑުގައި ޒުވާނަކު ދުއްވި ސައިކަލެއް މަގުހުރަސްކުރާ ފާހަގަ ހަރުކޮށްފައި ހުރި ހޮޅިދަނޑިއެއްގައި ޖެހި ވަނީ އެކްސިޑެންޓް ވެފައެވެ. އެހާދިސާގައި 32 އަހަރުގެ ޒުވާނަކަށް އަނިޔާވި އިރު، އިއްޔެރޭވެސް އެކްސިޑެންޓް ހިނގާފައި ވަނީ ހަމަ އެއްވަގުތެއްގައެވެ. އޭނާއަށްވެސް މާލެ ގެނެސް އައިޖީއެމްއެޗްގައި ދަނީ ފަރުވާ ދެމުންނެވެ.