ސޫރިޔާގެ ވެރިރަށް ދިމިޝްޤުގައި ހުންނަ އީރާނުގެ ކޮންސިއުލޭޓަށް އިޒްރޭލުން ހަމަލާދީ، އެކޮންސިއުލޭޓުގައި ތިބި އީރާން އަސްކަރިއްޔާގެ އިސް ބޭފުޅުންތަކެއް ޝަހީދުކޮށްލައިފިއެވެ.

މިހަމަލާގައި އީރާން އަސްކަރިއްޔާގެ ތިން މުޝީރުންނާއި، ކޮމާންޑަރަކު ވަނީ ޝަހީދު ވެފައެވެ. މިގޮތުން ޝަހީދުވި ކޮމާންޑަރަކީ، އީރާންގެ އިސްލާމިކް ރިވޮލިއުޝަނަރީ ކޮމާންޑްގެ ޤުދުސް ބްރިގޭޑްގެ ކޮމާންޑަރ މުޙައްމަދު ރިޟާ ޒާހިދީއެވެ. އިޒްރޭލުން ދަނީ، އީރާންގެ ކޮމާންޑަރުންނަށް މެރުމުގެ ސިލްސިލާއެއް ހިންގަމުންނެވެ. މިގޮތުން އިރާންގެ ކޮންސިއުލޭޓަށް ދިން ހަމަލާގެ ބޭނުމަކީ އެއީ ކަމުގައިވެސް ވަނީ ތުހުމަތުކޮށްފައެވެ.

އެމެރިކާ އަޑީގައި އޮވެ، މެދުއިރުމަތީގައި މިހާރު ހިނގަމުންދާ ހަނގުރާމައިގެ ތެރެއަށް އީރާން ވެއްދުމަށް، އިޒްރޭލު ބޭނުންކޮށްގެން އެމެރިކާއިން މަސައްކަތް ކުރަމުންދާ ކަމަށް ވަނީ ތުހުމަތުކޮށްފައެވެ. ސޫރިޔާ އިރާޤު ލީބިޔާ އަފްޣާނިސްތާނު ފަދަ އިސްލާމީ ޤައުމުތަކަށް އަރައިގަނެ އެޤައުމުތައް ސުންނާފަތިކޮށްލައި، އެމެރިކާއިން އެޤައުމުތަކުގެ މުއްސަނދިކަމާއި ޚަޒާނާތައް ލޫޓުވާލާފައި ވާއިރު، ތެލުގެ މުއްސަނދިކަން ލިބިފައިވާ އީރާނަށް އަރައިގަނެ އެޤައުމުގައި މިހާރު އޮތް ސަރުކާރު ވައްޓާލުމަށް އެމެރިކާއިން އަންނަނީ ސިއްރިޔާތުގައި މަސައްކަތް ކުރަމުން ކަމުގައިވެސް ބައިނަލްއަޤުވާމީ މަޝްރަޙް ދިރާސާ ކުރާ ފަރާތްތަކުން ބުނެފައިވެއެވެ.