ރާއްޖޭގެ ފަތުރުވެރިކަން ފެށުނު ފަހުން މިހާތަނަށް އަހަރުގެ ފުރަތަމަ ތިން މަހުގެ ތެރޭގައި، އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރި އަހަރަކަށް މިއަހަރު ވެއްޖެއެވެ.

ޓުއަރިޒަމް މިނިސްޓްރީ ހާމަކޮށްފައިވާ ތަފާސް ހިސާބުގައި ވާގޮތުގައި، މިއަހަރުގެ މާރިޗު މަހުގެ 31 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ ހަ ލައްކަ ހުރަސްކޮށްފައެވެ. މިގޮތުން، މިއީ އޭގެ ކުރީ އަހަރާއި އަޅާބަލާއިރު، 15 އިންސައްތައިގެ ކުރިއެރުމެކެވެ. 2023 ވަނަ އަހަރުގެ ފުރަތަމަ ތިން މަސްދުވަހު ރާއްޖެއަށް ޒިޔާރަތްކޮށްފައި ވަނީ، 523،928 ފަތުރުވެރިން ނަމަވެސް އެމުއްދަތުގައި މިއަހަރު ވަނީ، 605،004 ފަތުރުވެރިން ރާއްޖެއަށް ޒިޔާރަތްކޮށްފައެވެ.

ސަރުކާރުން އަންދާޒާ ކޮށްފައި ވަނީ މިއަހަރު ރާއްޖެއަށް ދެ މިލިއަން ފަތުރުވެރިން ޒިޔާރަތްކުރާނެ ކަމަށެވެ.