"ބިންވެރިޔާ" އަދި "ގެދޮރުވެރިޔާ" ސްކީމްއާއި ގުޅިގެން ހުށަހާޅާ މައްސަލަތަކާއި އަދި ނިންމަންޖެހޭ ނިންމުންތައް ނިންމުމަށް، އުފެއްދެވި ކޮމިޓީއަށް އިތުރު ތިން ބޭފުޅަކު ޢައްޔަނުކުރައްވައިފިއެވެ.

އެކޮމިޓީއަށް އަލަށް ޢައްޔަނު ކުރެއްވި ބޭފުޅުންނަކީ، ކުރީގެ ކޮންސްޓްރަކްޝަން މިނިސްޓަރ، މައުރޫފް ޖަމީލުގެ އިތުރުން ފާތިމަތު ސައީދާއި އާމިނަތު ޝާއިރާއެވެ.

ކޮމެޓީގެ ޗެއާމަން އަކަށް ކުރިން ޢައްޔަނުކުރައްވާފައިވާ، އަނީސާ އަޙްމަދު ވަނީ އެކަމަނާއަށް ސޯޝަލް މީޑިއާގައި ބަޔަކު ފާޑުކިޔައި ފުރައްސާރަކުރައްވަން ފައްޓަވާފައި ވަނިކޮށް އެކޮމިޓީން އިސްތިއުފާ ދެއްވާފައެވެ.

މިހާރު އެކޮމެޓީގެ ޗެއާމަން އަކީ އައިމިނިތު އީނާސްއެވެ. މިކޮމިޓީއަކީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ލަފާފުޅުގެ މަތިން، އުފެއްދެވި ކޮމިޓީއެއް ކަމުގައި ހައުސިންގ މިނިސްޓްރީން ވަނީ ބުނެފައެވެ.

"ގެދޮރުވެރިޔާ" ސްކީމްގެ ދަށުން ކުރީ ސަރުކާރުގައި ދޫކުރުމަށް ކަނޑައެޅި 4000 ފުލެޓް ލިބޭ މީހުންނަށް ފްލެޓްދީފައިވާ ގޮތް އެންޓިކަރަޕްޝަން ކޮމިޝަން އޭސީސީންވެސް ވަނީ ބަލާފައެވެ. އެކޮމިޝަނުން ހިންގި ތަޙްޤީޤަށްފަހުގައި ބުނެފައި ވަނީ، ގެދޮރުވެރިޔާ ސްކީމްގެ ތެރެއިން ފްލެޓް ލިބުނު %59 މީހުންގެ ޝަރުޠުތައް ފުރިހަމަ ނުވާ ކަމަށެވެ.